پولس اہلکاروں کی شہادت، یوگی حکومت کی ناکامی کا نتیجہ: دانش علی
دانش علی کا کہنا ہے کہ کانپور میں شہید ہوئے ہمارے بہادر جوان اترپردیش حکومت کی غلط پالیسیوں کا نتیجہ ہے جس کے سبب خطرناک بدمعاش وکاس دوبے کھلا گھومتا رہا۔
نئی دہلی: بہوجن سماج پارٹی کے رکن پارلیمنٹ کنور دانش علی نے کہا ہے کہ اترپردیش کی یوگی حکومت کی ناکامی کی وجہ سے کانپور میں آٹھ پولس اہلکاروں کی شہادت ہوگئی۔ امروہہ سے لوک سبھا رکن پارلیمنٹ دانش علی نے ٹوئٹ کر کے اتوار کو اترپردیش حکومت کے کام کرنے کی پالیسیوں پر سوال کھڑے کیے ہیں۔
دانش علی کا کہنا ہے کہ ’’کانپور میں شہید ہوئے ہمارے بہادر جوان اترپردیش حکومت کی غلط پالیسیوں کا نتیجہ ہے جس کے سبب خطرناک بدمعاش وکاس دوبے کھلا گھومتا رہا۔ حکومت کا پورا نظام صحافیوں، طالب علموں، حقوق انسانی کے کارکنوں اور اپنے فکری مخالفوں کو جھوٹے مقدموں میں جیل بھیجنے کا کام کرتا رہا اور جرائم پیشہ عناصر کھلے عام گھومتے رہے۔‘‘
واضح رہے کہ تین جولائی کی رات قتل کے معاملے میں مطلوب وکاس دوبے کو گرفتار کرنے گئی پولس کی ٹیم پر بدمعاشوں نے حملہ کردیا تھا۔ اس واقعہ میں ایک ڈپٹی سپرنٹنڈنٹ اور ایک تھانہ انچارج سمیت آٹھ جوان شہید ہوگئے تھے۔
یہ بھی پڑھیں : ملک میں کورونا سے ریکارڈ 631 ہلاکتیں اور24850 نئے معاملے
واقعہ کے کچھ ہی گھنٹوں کے اندر پولیس نے واردات میں ملوث وکاس دوبت کے دو رشتہ داروں کو مار گرایا تھا۔ دوبے کی تلاش میں پولس کی پچاس سے زیادہ ٹیمیں ریاست کے مختلف اضلاع میں تلاش کر رہی ہیں۔ اس سلسلے میں پانچ سو سے زیادہ موبائل فون کو سرویلانس پر رکھا گیا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔