مدھیہ پردیش: رام کھیلاون پٹیل کا وقف بورڈ کی آمدنی بڑھانے پر زور

بھوپال: مدھیہ پردیش کے اقلیتی اور پسماندہ طبقات کے فلاح و بہبود کے وزیر رام کھیلاون پٹیل نے کہا ہے کہ ریاست میں وقف بورڈ کی جائداد کا رکھ رکھاؤ اس طرح سے کیا جائے جس سے بورڈ کی آمدنی میں اضافہ ہو۔ سرکاری ذرائع کے مطابق رام کھیلاون پٹیل نے گزشتہ روز یہاں ریاستی وقف بورڈ کے کاموں کا جائزہ لیا۔ انہوں نے وقف بورڈ کے کام میں شفافیت لانے کے لیے بورڈ کی سرگرمیوں کا کمپیوٹرائیزیشن کیے جانے پر بھی زور دیا۔

میٹنگ میں بتایا گیا کہ ریاستی وقف بورڈ میں رجسٹرڈ جائداد کی تعداد 14 ہزار 901 ہے۔ ان کی دیکھ ریکھ کا کام فی الحال 2500 کمیٹیوں کی جانب سے کیا جا رہا ہے۔ یہ بھی بتایا گیا کہ مدھیہ پردیش وقف بورڈ کی جائداد کا کمپیوٹرائیزیشن اور ڈیجیٹلائیزیشن کا کام مکمل کیا جا چکا ہے۔

میٹنگ میں بتایا گیا کہ ریاست میں وقف کی زرعی زمین کی نیلامی کا کام متعلقہ علاقے کے تحصیلدار کی جانب سے کیا جا رہا ہے جبکہ وقف کی جائداد پٹہ قانون میں ترمیم کے مطابق وقف کی جائداد کی نیلامی کے کام میں وقف بورڈ کو اتھارٹی بنایا گیا ہے۔ اس عمل سے وقف بورڈ کی آمدنی کو کافی حد تک بڑھایا جا سکتا ہے۔

پسماندہ طبقات اور اقلیتی فلاح و بہبود کے کمشنر ایم کے اگروال نے بورڈ کے چیف ایگزیکیٹیو افسر محمد احمد خان کو ہدایت دی کہ وقف بورڈ کی زمین اور دیگر جائداد کی نیلامی کے عمل کو آن لائن کیا جائے۔ انہوں نے بورڈ سے متعلق عدالتی معاملوں کی صورتحال کا بھی جائزہ لیا۔