جمہوریت کو نقصان پہنچانے والوں کو سزا دلانا یقینی بنائے گا انڈیا اتحاد: راہل گاندھی

نئی دہلی: لوک سبھا میں قائد حزب اختلاف راہل گاندھی نے کہا کہ انڈیا اتحاد ہندوستانی جمہوریت کو نقصان پہنچانے والوں کو سزا دلانا یقینی بنائے گا۔ انہوں نے کہا کہ اس معاملے میں کسی شخص کا عہدہ یا سینیارٹی اہمیت نہیں رکھتی، کیونکہ جمہوریت ملک کے ہر فرد سے بڑی ہے۔

راجدھانی دہلی میں واقع کانسٹی ٹیوشن کلب میں انڈیا اتحاد کے اجلاس کے بعد میڈیا سے گفتگو کرتے ہوئے راہل گاندھی نے کہا کہ اپوزیشن جماعتوں کے رہنماؤں نے اجتماعی طور پر ہندوستانی آئین کے تحفظ کی ذمہ داری لی ہے۔ انہوں نے اعتماد ظاہر کیا کہ آنے والے مہینوں میں اپوزیشن ملک میں بڑی تبدیلی لانے میں کامیاب ہوگی۔

راہل گاندھی نے کہا کہ اجلاس میں سب سے اہم مسئلہ ووٹ چوری کا رہا۔ ان کے مطابق تمام اپوزیشن جماعتوں کا ماننا ہے کہ بی جے پی، وزیر اعظم نریندر مودی، وزیر داخلہ امت شاہ اور چیف الیکشن کمشنر گیانیش کمار نے ہندوستانی جمہوریت پر حملہ کیا ہے۔ انہوں نے کہا، ’’یہ انڈیا کے تمام رہنماؤں کی ذاتی وابستگی ہے کہ ہم ہندوستانی جمہوریت کو تباہ کرنے والے لوگوں کو سزا دلانا یقینی بنائیں گے۔ اس سے کوئی فرق نہیں پڑتا کہ وہ کتنے سینئر ہیں یا کون ہیں۔ ہندوستانی جمہوریت اس ملک کے ہر فرد سے بڑی ہے۔‘‘

کانگریس کے رکن پارلیمنٹ نے کہا کہ اجلاس کے دوران یہ احساس بھی سامنے آیا کہ اپوزیشن عوام تک یہ بات پہنچانے میں بڑی حد تک کامیاب رہی ہے کہ انتخابات میں دھاندلی ہو رہی ہے اور بی جے پی کے رہنماؤں نے جمہوریت کو نقصان پہنچایا ہے۔

راہل گاندھی نے کہا کہ خاص طور پر نوجوانوں میں ایک نیا مزاحمت کا جذبہ نظر آ رہا ہے۔ ان کے مطابق نوجوانوں کو محسوس ہو رہا ہے کہ ملک میں جو کچھ ہو رہا ہے وہ غلط ہے اور اسے روکا جانا چاہیے۔ انہوں نے کہا کہ انہوں نے تمام اپوزیشن رہنماؤں سے یہ بھی کہا ہے کہ وہ ہندوستانی آئین کے اجتماعی محافظ ہیں۔

راہل گاندھی نے اپوزیشن جماعتوں کے ساتھ مل کر کام کرنے کو باعثِ اعزاز قرار دیتے ہوئے کہا کہ انہیں یقین ہے کہ آنے والے چند ماہ میں ملک میں اہم تبدیلیاں ہوں گی۔ انڈیا اتحاد کے اہم رہنماؤں نے قومی راجدھانی میں ہونے والے اجلاس میں الیکشن کمیشن کے جانبدارانہ رویے کے خلاف ملک گیر احتجاج کی حکمت عملی پر بھی تبادلہ خیال کیا۔

دریں اثنا، کانگریس نے ووٹر فہرستوں کی خصوصی گہری نظرثانی (ایس آئی آر) واپس لینے کا مطالبہ دہرایا۔ پارٹی نے کہا کہ ملک میں ووٹ دینے کا حق عوام کا ہے۔ اپوزیشن جماعتوں نے الیکشن کمیشن کے کام کاج پر بھی سوالات اٹھاتے ہوئے اس کے طریقہ کار کو ناقص اور جانبدارانہ قرار دیا۔ میٹنگ کا مقصد ان مسائل پر اپوزیشن جماعتوں کو متحد کرنا اور ملک گیر احتجاج کے لیے مشترکہ حکمت عملی تیار کرنا تھا۔