ہریانہ: سینکڑوں کسانوں نے وزیر تعلیم کی رہائش کا کیا گھیراؤ، دو روزہ دھرنا شروع

بھارتیہ کسان یونین کی اپیل پر 25 اگست کو سینکڑوں کی تعداد میں کسان یمنا نگر میں جمع ہوئے اور ہریانہ کی کھٹر حکومت کے خلاف نعرے بازی کی۔ بڑی تعداد میں کسانوں نے وزیر تعلیم کے گھر کا گھیراؤ بھی کیا اور ملاقات نہیں ہونے پر دو روزہ دھرنا شروع کر دیا ہے۔ دراصل بھارتیہ کسان یونین نے آج اپنے مطالبات کو لے کر ہریانہ میں سبھی وزراء کی رہائش پر کسان پنچایت کرنے کا اعلان کیا تھا۔ جیسے ہی کسان وزیر تعلیم کی رہائش پر پہنچے، اس سے پہلے ہی پولیس انتظامیہ نے پورے علاقے کو پولیس چھاؤنی میں تبدیل کر دیا۔

میڈیا رپورٹس کے مطابق کسان جیسے ہی کالونی کے گیٹ پر پہنچے تو انھیں روک دیا گیا۔ بعد ازاں کسان دو دن کے لیے وہیں دھرنا دے کر بیٹھ گئے۔ بھارتیہ کسان یونین کے ریاستی صدر گرنام سنگھ چڈھونی نے کہا کہ جیسا برتاؤ ہمارے ساتھ وزیر محترم کر رہے ہیں، اب ان کے ساتھ بھی کسان ویسا ہی برتاؤ کریں گے۔ چڈھونی نے کہا کہ جب پہلے سے ہمارا پروگرام طے تھا تو وزیر تعلیم کو موجود رہنا چاہیے تھا۔

وزیر تعلیم سے ناراض کسانوں نے یمنانگر میں ان کی رہائش کے قریب ہی سڑک پر ٹینٹ لگا کر رات گزارنے کا انتظام کرنا شروع کر دیا ہے۔ کسانوں کا کہنا ہے کہ وہ کل شام تک ایسے ہی سڑک پر بیٹھے رہیں گے، اور جب تک وزیر ان سے ملنے نہیں آتے، یا پھر ان کا کوئی نمائندہ نہیں آتا، وہ دھرنا جاری رکھیں گے۔