کسان تحریک: اب دہلی-سہارنپور ہائی وے ہوگا جام، 19 دسمبر سے ہوگی غیر معینہ ہڑتال

باغپت: مرکزی حکومت کے ذریعہ پاس کیے گئے تین نئے زرعی قوانین کے خلاف سنگھو سرحد و یوپی گیٹ پر سراپا احتجاج کسانوں کے ساتھ اب تیسرا مورچہ دہلی۔سہارنپور ہائی وے پر بڑوت صنعتی پولیس چوکی پر 19دسمبر کو دہلی۔سہارنپور ہائی وے کو جام کر کے کھولا جائے گا۔

جمعرات کو بڑوت میں چودھری سریندر سنگھ کی رہائش گاہ پر دیش کھاپ کی میٹنگ ہوئی۔ میٹنگ میں کھاپ پنچایتوں نے بھی کسانوں کی تحریک کو اپنی حمایت دینے کا اعلان کیا۔ اس کے ساتھ ہی کسان 19 دسمبر کو دہلی سہانپور ہائی وے کو جام کر کے غیر معینہ ہڑتال پر بیٹھیں گے۔

میٹنگ میں شرکت کرنے کے بعد میڈیا نمائندوں سے اپنی بات چیت میں بھارتیہ کسان یونین کے صدر چودھری نریش ٹکیت نے کہا کہ حکومت ہٹ دھرمی پر آمادہ ہے۔ اب تک چھ دور کی گفتگو ہوچکی ہے۔ لیکن کوئی بھی حل نہیں نکل سکا ہے۔ حکومت کو اعلی سطحی میٹنگ بلا کر کسانوں کے مسائل کا جلد از جلد تصفیہ کرنا چاہیے۔

نریش ٹکیت نے مزید کہا کہ آج کسانوں کے احتجاج کا 22 واں دن ہے کسان سردی کے موسم میں کھلے آسمان کے نیچے پڑے ہوئے ہیں۔ لیکن حکومت کوئی دھیان نہیں دے رہی ہے۔ حکومت چاہتی ہے کہ کسانوں میں ٹکراؤ پیدا ہو۔ کسان ٹکراؤ نہیں چاہتے وہ اپنے مسائل کا حل چاہتے ہیں۔ حکومت اسے معمولی بات سمجھ رہی ہے لیکن یہ کافی حساس مسئلہ ہے۔