’’ہم نے ایسا عدالتی نظام پہلےکبھی نہیں دیکھا‘‘

ممبئی: ممبئی کے 'کانجور مارگ میٹرو کار شیڈ' کے معاملے میں بمبے ہائی کورٹ کی جانب سے کل بدھ کو دیئے گئے فیصلے کو 'بدقسمتی' سے تعبیر کرتے ہوئے رکنِ پارلیمنٹ اور شیو سینا کے ترجمانِ اعلیٰ سنجے راؤت نے یہ تبصرہ کیا کہ "آج کل عدالتیں کسی بھی معاملے میں دخل اندازی کرنے لگ گئی ہیں۔"

عدالتوں کی جانب سے دخل در معقولات کے بڑھتے ہوئے رجحان پر تشویش اور افسوس کا اظہار کرتے ہوئے سنجے راؤت نے اخبار نویسوں سے کہا کہ 'کانجور مارگ میٹرو کار شیڈ' کے معاملے میں بھارتیہ جنتا پارٹی کی جانب سے سیاست کی گئی اور اگر عدالت اس معاملے میں دخل نہ دیتی تو بہتر ہوتا۔

سنجے راؤت نے کہا کہ " کانجور مارگ زمین مہاراشٹر کی ہے اور اس کے یہ دوسرے دعویدار کہاں سے آئے ہیں؟ عدالتیں آج کل کسی بھی معاملے میں مداخلت کرتی ہیں؛ اعلیٰ عدالت نے نچلی عدالت کو نظرانداز کرتے ہوئے قتل کے ایک ملزم کو ضمانت دی، حکومت کو 'غیر قانونی' قرار دیا جاتا ہے جب وہ غیر مجاز تعمیرات کے خلاف کارروائی کرتی ہے، ہم نے ایسا عدالتی نظام پہلے کبھی نہیں دیکھا۔"

سنجے راؤت نے واضح کیا کہ کانجورمارگ اراضی ممبئی، مہاراشٹر اور ملک کی ترقی کے لئے درکار ہے اور "کوئی سیاستدان وہاں بنگلہ یا فارم ہاؤس بنانے نہیں جا رہا ہے۔" عدالتی فیصلے پر ندامت کا اظہار کرتے ہوئے ، انہوں نے نشاندہی کی کہ بی جے پی کی زیر قیادت سابقہ حکومت وہاں پر پولیس اور کمزور طبقات کے لئے رہائشی منصوبہ شروع کرنا چاہتی تھی، جس کا صاف مطلب یہ ہے کہ یہ زمین ریاستی حکومت کی ہے، لہذا اس طرح کے ترقیاتی منصوبوں کی مخالفت کرنا لوگوں میں غم و غصہ پیدا کرسکتا ہے اور ان کی مشکلات میں اضافہ کریں۔

شیوسینا ترجمان نے کہا کہ "اس سے حکومت بھی بدنام ہو جاتی ہے اور لوگوں پر مالی بوجھ بڑھ جائے گا۔ جب ملک میں لاکھوں مقدمات میں صرف 'تاریخ پر تاریخ ' دی جاتی ہے، پنجاب میں کسان خودکشی کر رہے ہیں، عدالتوں اور مرکز کو ایسے معاملات پر توجہ دینی چاہیے۔ اور عدالتوں کو انصاف کی فراہمی کو یقینی بنانا چاہیے۔"