یوپی کے 53 اضلاع میں ضلع پنچایت صدر کے لئے انتخابی عمل مکمل، بی جے پی اور سماجوادی پارٹی میں مقابلہ

ریاستی الیکشن کمیشن نے انتخابات کے دوران نظم و نسق کی صورت حال برقرار رکھنے کے لئے پختہ انتظامات کیے ہیں۔

علامتی تصویر
علامتی تصویر
user

قومی آوازبیورو

لکھنؤ: اتر پردیش کے 53 اضلاع میں آج ضلع پنچایت صدر کے لئے انتخابات ہوئے۔ اس کے پیش نظر تمام اضلاع میں سیکورٹی کے وسیع انتظامات کیے گئے ہیں۔ انتخابات میں بی جے پی اور سماجوادی پارٹی کا مقابلہ ہے۔

ریاست کی 75 ضلع پنچایتوں میں صدر کے عہدے کے انتخابات میں 29 جون کو کاغذات نامزدگی واپس لینے کے آخری دن 21 اضلاع میں بی جے پی اور ایک ایٹاوہ ضلع میں سماجوادی پارٹی کے امیدوار بلامقابلہ منتخب ہو گئے۔ بقیہ 53 اضلاع میں آج 11 بجے سے 3 بجے تک انتخابی عمل جاری رہا۔


انتخابات مکمل ہو چکے ہیں اور شام تک نتائج کا اعلان کر دیا جائے گا۔ ریاستی الیکشن کمیشن نے انتخابات کے دوران نظم و نسق کی صورت حال برقرار رکھنے کے لئے پختہ انتظامات کیے ہیں۔ رام پور، پرتاپ گڑھ، اناؤ اور سلطان پور میں سہ رخی مقابلہ ہے, جبکہ ایٹہ، سیتاپور اور جون پور میں چہار رخی مقابلہ نظر آ رہا ہے۔ جبکہ بقیہ 45 اضلاع میں بی جے پی کا سماجوادی پارٹی سے براہ راست مقابلہ ہے۔

یو پی کے ان اضلاع میں آج انتخابات کرائے گئے: چندولی، ہاپوڑ، سلطان پور، مرزاپور، رائے بریلی، متھرا، فیروز آباد، بجنور، حمیر پور، مظفر نگر، سونبھدرہ ، بلیا، غازی پور، اناؤ ، ہردوئی، کشی نگر، مین پوری، پرتاپ گڑھ، قنوج، جالون، مہاراج گنج، سنت کبیر نگر، لکھیم پور، الہ آباد، بھدوہی، بارابنکی، فرخ آباد، سنبھل، بستی، فتح پور، شاملی، علی گڑھ، جون پور، کاس گنج، اعظم گڑھ، سدھارتھ نگر، ایٹہ، ایودھیا، رام پور، سیتا پور، اورئیہ، مہوبہ، کانپور شہر، کانپور دیہت، امبیڈکر نگر، بریلی، کوشامبی، ہاتھرس، دیوریا اور لکھنؤ۔


اس سے قبل منگل کو اتر پردیش کے 22 اضلاع میں ضلع پنچایت صدور کو بلامقابلہ منتخب قرار دیا گیا تھا۔ ضلع ایٹاوہ میں سماجوادی پارٹی کے امیدوار کو کامیابی ملی جبکہ دیگر 21 اضلاع میں حکمران جماعت بی جے پی کی جیت ہوئی۔

بی جے پی کو ان اضلاع میں بلا مقابلہ کامیابی حاصل ہوئی:

سہارنپور، بہرائچ، چترکوٹ، آگرہ، گوتم بدھ نگر، میرٹھ، غازی آباد، بلندشہر، امروہہ، مراد آباد، للیت پور، جھانسی، باندہ، شرواستی، بلرام پور، گونڈا، گورکھپور، مؤ، وارانسی، پیلی بھیت اور شاہجہانپور۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔