رگھوونش پرساد کے انتقال کے بعد ان کے خطوط پر اٹھے سوال، سیاست بھی گرم

بہار کے سینئر سماجوادی لیڈر اور سابق مرکزی وزیر رگھوونش پرساد سنگھ کے انتقال کے بعد ایک طرف جہاں ان کے آبائی گاؤں پاناپور شاہپور میں سرکاری اعزاز کے ساتھ ان کی آخری رسومات کی ادائیگی چل رہی ہے، وہیں دوسری طرف انتقال سے پہلے ان کے ذریعہ بہار کے وزیر اعلیٰ نتیش کمار کو لکھے خطوط کو لے کر اب بہار کے سیاسی ماحول میں سوال اٹھنے لگے ہیں اور ساتھ ہی سیاست بھی گرم ہو گئی ہے۔

پیر کے روز آر جے ڈی رگھوونش پرساد کے اسپتال سے لکھے خط پر ہی سوال اٹھا دیا ہے جسے لیکن بی جے پی اور جنتا دل یو کےلیڈران نے آر جے ڈی پر نشانہ سادھا ہے۔ آر جے ڈی کے رکن اسمبلی بھائی ویریندر نے سابق مرکزی وزیر رگھوونش پرساد کے ذریعہ لکھے خطوں پر سوال اٹھاتے ہوئے کہا کہ کوئی بھی شخص اسپتال کے آئی سی یو سے کیسے خط لکھ سکتا ہے۔ انھوں نے اسے ایک سازش قرار دیا۔

دوسری طرف کانگریس کے سینئر لیڈر اور راجیہ سبھا رکن پارلیمنٹ اکھلیش پرساد سنگھ نے رگھوونش پرساد سنگھ کو سادھو سنت مزاج کی شخصیت بتاتے ہوئے کہا کہ انھوں نے کچھ دن پہلے ہی رگھوونش پرساد سے ملاقات کی تھی۔ اس وقت وہ نتیش اور مودی حکومت کی تنقید کر رہے تھے، جب کہ لالو پرساد کی تعریف کی تھی۔ انھوں نے کہا کہ "میں نے تو پہلے ہی کہا ہے کہ یہ خط ایک سازش ہے۔"

اِدھر جے ڈی یو نے اس پر جوابی حملہ کیا ہے۔ بہار کے وزیر نیرج کمار نے کہا کہ آر جے ڈی اب سماجوادی لیڈر کے انتقال کے بعد غیر اخلاقی تبصرے کر رہی ہے۔ زندہ رہنے پر تو آر جے ڈی کے لیڈران نے ان کی خیریت تک نہیں لی۔ انھوں نے جب اپنے جذبات ایک خط کے ذریعہ سے ظاہر کیے تو اب آر جے ڈی لیڈران اسی پر سوال اٹھا رہے ہیں۔ بی جے پی نے تو اس تعلق سے آر جے ڈی کو اَن پڑھ اور گنواروں کی جماعت تک قرار دے دیا ہے۔

غور طلب ہے کہ اتوار کے روز سابق مرکزی وزیر رگھوونش پرساد سنگھ کا دہلی کے ایمس انتقال ہو گیا تھا۔ اس سے پہلے انھوں نے لالو یادو کے نام لکھے خط میں آر جے ڈی سے استعفیٰ دے دیا تھا۔ اس خط کو بہار کے میڈیا میں جاری کیا گیا تھا۔ اس کے بعد انتقال سے ایک دن پہلے تک رگھوونش پرساد کے نام سے بہار کے وزیر اعلیٰ نتیش کمار کو لکھے ایک کے بعد ایک چار خطوط میڈیا میں جاری ہوئے جن میں ویشالی گڑھ پر یوم جمہوریہ کے موقع پر 26 جنوری کو ترنگا لہرانے کے مطالبہ سمیت کئی دیگر مطالبات رکھے گئے تھے۔ دعویٰ کیا گیا کہ یہ سبھی خط رگھوونش بابو نے آئی سی یو سے لکھے ہیں۔