تمل ناڈو کے شہر وانمباڑی میں بھارت جوڑو نیائے یاترا ’بائیک ریلی‘ کا انعقاد، ’جمہوریت اور مساوات کو برقرار رکھنے کی اجتماعی کوشش‘

وانمبازی: کانگریس لیڈر راہل گاندھی کی قیادت میں جاری انڈین نیشنل کانگریس کی بھارت جوڑو نیائے یاترا کامیابی کے ساتھ جاری ہے، جس میں ملک بھر کے عوام کو درپیش مسائل اور مودی حکومت کی ناقص پالیسیوں کا انکشاف کیا جا رہا ہے۔ دریں اثنا، ملک کے کئی شہروں میں اسی یاترا کی طرز پر تقاریب منعقد کی جا رہی ہیں۔ اسی ضمن میں تمل ناڈو کے وانمباڑی شہر میں بھارت جوڑو نیائے یاترا ’بائیک ریلی‘ کا انعقاد کیا گیا۔

تمل ناڈو کانگریس کمیٹی کے اقلیتی شعبہ کی جانب سے جاری کردہ ایک پریس بیان کے مطابق تروپتور ضلع کانگریس کمیٹی کے صدر پر بھوستیا نارائن کی رہنمائی اور وانمباڑی اسمبلی کے لئے کانگریس کمیٹی کے انچارج سید برہان کی قیادت میں، بھارت جوڑو نیائے یاترا بائیک ریلی کا اہتمام انتہائی شاندار طریقہ سے اتحاد و انصاف کے جذبے کے ساتھ کیا گیا۔

ریلی شہر وانمباڑی کی اہم سڑکوں سے انصاف، بھائی چارے اور ہم آہنگی کے پر جوش نعرے لگاتے ہوئے اپنے مرکزی، ریاستی اور مقامی قائدین کے ہمراہ گزری۔ بھارت جوڑو نیائے یاترا کی بائیک ریلی کا پر جوش آغاز امبیڈکر مجسمہ سے ہوا اور یہ اہم سڑکوں سے گزرتے ہوئے بس اسٹینڈ میں واقع اندرا گاندھی کے مجسمہ تک پہنچی، جہاں آنجہانی اندارا گاندھی کے مجسمہ کی گلپوشی کی گئی۔

سابق مرکزی وزیر کے دی تھنگا بالو، اے آئی سی سی پروفیشنلز کانگریس کمیٹی کے چیرمین ڈاکٹر پروین چکرورتی اور پردیش کانگریس کمیٹی کے رکن اور وانمباڑی کانگریس کمیٹی اسمبلی حلقہ کے انچارج سید برہان جیسی شخصیات کے ہمراہ تقریباً 600 پر جوش کارکنوں نے ریلی میں شرکت کی۔ ان کے ساتھ مقامی عہدیداروں اور رفقاء موٹور مزمل، سید اظہر الدین، شیخ اسلم، جنید، سالار نیامت اللہ اور دیگر اراکین بھی شریک رہے۔

اس موقع پر قومی آواز سے گفتگو کرتے ہوئے جواہر بال منچ کے ریاستی کاآرڈنیٹر موٹور محمد مزمل نے بتایا کہ بھارت جوڑو نیائے بائیک ریلی ہماری قوم کی بنیادوں کو مضبوط بنانے اور جمہوریت اور مساوات کے اصولوں کو برقرار رکھنے کی اجتماعی کوشش کی ایک علامت ہے۔ وانمباڑی کی اس یادگار ریلی کے بعد سب کی نگاہیں اتحاد اور انصاف کی ان بلند آوازوں والی قیادت پر مرکوز ہیں جن کی گونج ان گلیوں میں سنی گئی تھی۔