امید ہے کہ حکومت شورش زدہ افغانستان سے تمام ہندوستانیوں کو بحفاظت واپس لائے گی: کانگریس

نئی دہلی: متعدد ہندوستانیوں سمیت 150 افراد کو طالبان کی جانب سے اغوا کئے جانے کی خبر پر رد عمل ظاہر کرتے ہوئے کانگریس نے افغانستان کی صورت حال کو خطرناک قرار دیا ہے۔ پارٹی نے امید ظاہر کی ہے کہ نریندر مودی حکومت اس بحران پر توجہ دے گی اور تمام ہندوستانی شہریوں کو بحفاظت واپس لانے کے لئے حتمی کارروائی کرے گی۔

ایک ٹوئٹ میں کانگریس کے ترجمان رندیپ سنگھ سرجے والا نے کہا کہ یہ بے حد پریشان کن اور تشویش ناک بات ہے۔ یہی وجہ ہے کہ کانگریس نے مودی حکومت سے تمام ہندوستانیوں کو نکالنے اور اپنی ذمہ داری سے قدم پیچھے نہیں کھینچنے کی اپیل کی ہے۔ امید ہے کہ مودی حکومت اب اس پر توجہ دے گی اور ہمارے تمام شہریوں کو بحفاظت واپس لائے گی۔

سرجے والا کا رد عمل افغانستان کی مقامی میڈیا کے ذریعہ یہ خبر رپورٹ کئے جانے کے فوراً بعد سامنے آیا ہے کہ طالبان نے ہفتہ کے روز کابل ہوائی اڈے سے 150 سے زیادہ افراد کو اغوا کر لیا ہے، جن میں بیشتر ہندوستانی شامل ہیں۔ تاہم، طالبان کے ایک عہدیدار نے غیر ملکی افراد کے اغوا کی تردید کی ہے۔

طالبان کے ترجمان احمد اللہ واسیک نے کہا، کابل ایئر پورٹ سے غیرملکی افراد کو اغوا کئے جانے کی خبر محض افواہ ہے۔ طالبان کے نمائندگان تمام غیر ملکی شہریوں کو ہوائی اڈے تک پہنچنے میں مدد کر رہے ہیں۔ ہم تمام غیرملکیوں کو ہوائی اڈے تک پہنچنے کے لئے محفوظ راستہ فراہم کر رہے ہیں۔ خیال رہے کہ طالبان نے گزشتہ اتوار کے روز افغانستان کے اقتدار پر قبضہ کر لیا تھا اور اب وہ وہاں حکومت سازی کی کوشش کر رہا ہے۔