آئی پی ایل: ممبئی پر فتح کے بعد راہل نے کہا "ہمیں دو پوائنٹس کی اشد ضرورت تھی"

دبئی: ممبئی انڈینز کے خلاف سنسنی خیز مقابلے کے سپر اوور میں فتح کے بعد کنگز الیون پنجاب کے کپتان لوکیش راہل نے کہا ہے کہ ٹیم کو اس وقت اس جیت سے دو پوائنٹس کی اشد ضرورت تھی۔ ممبئی نے اوپنر کوئنٹن ڈی کوک کے 53 اور کیرون پولارڈ کے ناقابل شکست 34 رنز کی مدد سے 20 اوورز میں چھ وکٹوں پر 176 رنز کا مشکل اسکور کیا تھا، جبکہ کپتان لوکیش راہل کے 77 رنز پر پنجاب نے چھ وکٹوں پر 176 رنز بنالئے۔ اسکور برابر ہونے پر میچ فیصلے کے لئے ایک سپر اوور میں گیا۔ پہلے سپر اوور میں پنجاب نے پانچ رنز بنائے جبکہ ممبئی بھی پانچ رنز ہی بنا سکی۔ دوسرے سپر اوور میں ممبئی نے 11 رنز بنائے جبکہ پنجاب نے 15 رنز بناکر میچ جیت لیا۔ اس جیت کے ساتھ ہی پنجاب نے ٹورنامنٹ میں اپنی امیدوں کو برقرار رکھا۔

راہل نے کہا کہ سپر اوور پہلی بار نہیں ہوا ہے اور اب میں اس کا عادی ہوگیا ہوں لیکن فتح سے دو پوائنٹس حاصل کرنا ہمارے لئے بہت ضروری تھا۔ یہ ہمیشہ نہیں ہوتا ہے لہذا ایسی صورتحال میں آپ کو توازن رکھنا پڑتا ہے۔ ہم نے جس میچ میں شکست کھائی اس میں ہم نے بھی عمدہ کارکردگی کا مظاہرہ کیا۔ ہم ہر میچ میں سختی سے واپس آئے ہیں اور اس میچ میں فتح سے ہمیں تحریک اور مدد ملے گی۔

انہوں نے کہا کہ 20 اوورز میں وکٹ کیپنگ کے بعد پہلے چھ اوورز میں بیٹنگ کرنا بہت مشکل ہے۔ ہم جانتے تھے کہ ممبئی کے اچھے اسپنر ہیں اور پچ سست ہوگی لہذا مینک اور میں نے ٹیم کو اچھی شروعات دینے کی کوشش کی۔ جب کرس گیل اسپنرز کے خلاف کھیلتے ہیں تو مجھے یقین رہتا ہے کہ وہ اچھا کھیلیں گے۔

کپتان نے کہا کہ گیل کی موجودگی سے مدد ملی ہے۔ وہ ایک تجربہ کار کھلاڑی ہیں اور ٹیم کو آگے لے جانے کا طریقہ جانتے ہیں ۔ کوئی ٹیم سپر اوور کے لئے تیار نہیں ہوتی۔ ایسی صورتحال میں آپ کو اپنے بولنگ ڈپارٹمنٹ پر انحصار کرنا ہوگا۔ محمد سمیع چھ بال یارکر کر سکتے ہیں اور وہ ٹیم میں بہترین بولر ہیں۔

راہل نے کہا کہ یہ ضروری ہے کہ سینئر کھلاڑی جیت میں حصہ ڈالیں۔ جب آپ مستقل طور پر ہارتے ہیں تو آپ کو تمام فتوحات سے خوشی ملتی ہے۔ ڈریسنگ روم نے اس عمل پر توجہ دینے اور پرسکون رہنے کے بارے میں بات کی۔ یہ ماحول ہم آگے بھی برقرار رکھنا اور میچ جیتنا چاہتے ہیں۔