طاقتور طوفان 'خانون' نے روس کے کچھ حصوں میں مچائی تباہی، بگڑتے حالات دیکھ کر ایمرجنسی نافذ کرنے کا اعلان

جاپان میں آئے طوفان کے بعد زوردار بارش کے سبب روس کے مشرق بعید کے کچھ حصوں میں سیلاب جیسی حالت پیدا ہو گئی ہے۔ یعنی طاقتور طوفان 'خانون' کا اثر اب روس پر بھی واضح طور سے دیکھنے کو مل رہا ہے۔ حالات اتنے خراب ہو چکے ہیں کہ مقامی افسران کو کچھ حصوں میں ایمرجنسی نافذ کرنے کا اعلان کرنا پڑا ہے۔ اس کے ساتھ ہی سیلاب میں پھنسے لوگوں کو بہ حفاظت نکالنے کی کوشش کی جا رہی ہے۔

روس کی آر آئی اے ایجنسی نے بتایا کہ روسی بعید مشرق میں روس اور ایشیائی براعظم کے سب سے مشرقی حصے میں 32 بستیاں کٹ گئی ہیں۔ اس کے ساتھ ہی سینکڑوں گھروں میں پانی بھر گیا ہے۔ اس علاقے کی سڑکیں تقریباً پانی میں ڈوب گئی ہیں۔ ہزاروں افراد کو مشکلات کا سامنا ہے۔ آر آئی اے نے یہ بھی بتایا کہ ولادیووستوک سے تقریباً 100 کلومیٹر (62 میل) شمال میں 150000 سے زیادہ لوگوں کے شہر اُسوریسک کے کچھ حصوں کو بھی خالی کرایا گیا ہے۔ دراصل یہاں سیلاب کو روکنے کے لیے بنایا گیا ایک پشتہ ٹوٹ گیا ہے جس سے پانی تیزی کے ساتھ بڑھ رہا ہے۔

ایمرجنسی خدمات کا حوالہ دیتے ہوئے آر آئی اے نے بتایا کہ فی الحال 9 نگر پالیکاؤں میں ایمرجنسی نافذ کرنے کا اعلان کیا گیا ہے۔ آگے کے حالات پر افسران نظر بنائے ہوئے ہیں۔ حالات کو دیکھتے ہوئے ہی مزید کوئی فیصلہ لیا جائے گا۔

واضح رہے کہ گزشتہ ہفتہ طاقتور طوفان 'خانون' نے جنوبی جاپان میں زبردست تباہی مچائی تھی۔ اس طوفان کے سبب بڑی تعداد میں پروازوں کو رد کیا گیا۔ فی الحال یہ طوفان جنوبی کوریا میں اپنا قہر دکھا رہا ہے جہاں جمعرات کو اس کی وجہ سے ایک شخص کی موت بھی ہو گئی اور ایک لاپتہ ہو گیا۔ جنوبی کوریا کے افسران نے جمعہ کو جانکاری دیتے ہوئے بتایا کہ طوفان کے سبب ملک بھر میں تقریباً 361 عمارتوں کو نقصان پہنچا ہے۔ اس کے علاوہ ہزاروں گھروں میں بجلی فراہمی ٹھپ ہے۔