بھارت : پہلی 'اپنے آپ سے شادی' متنازعہ

ہندو قوم پرست جماعت بھارتیہ جنتا پارٹی کی رہنما سنیتا شکلا نے چھما بندو کے سولوگیمی کے اعلان کو ''ہندو مت کے خلاف‘‘ قرار دیا۔ انہوں نے کہا،''ایسی شادی سے ہندوؤں کی آبادی کم ہو جائے گی۔ یہ ہندو مت کے خلاف ہے۔ ہم کسی مندر میں اس طرح کی شادی کی تقریب منعقد کرنے کی اجازت نہیں دیں گے۔‘‘

گجرات کے بڑودہ (اب وڈودرا) کی سابق ڈپٹی میئر شکلا نے مزید کہا کہ اگر کوئی شخص مذہب کے خلاف کوئی کام کرتا ہے تو قانون میں بھی اس کی کوئی گنجائش نہیں ہے۔ انہوں نے چھما شکلا کو 'ذہنی مریضہ‘ قرار دیتے ہوئے کہا کہ ہندو دھرم میں کوئی لڑکا کسی لڑکے سے اور کوئی لڑکی کسی لڑکی سے بھی شادی نہیں کرسکتی۔

قبل ازیں سابق مرکزی وزیر اور مہاراشٹر کانگریس کے رہنما ملند دیورا نے بھی اس 'شادی' پر نکتہ چینی کرتے ہوئے کہا تھا، ''بھگوان کرے بھارت ایسی غیر معقول چیزوں سے دور ہی رہے۔'' حالانکہ اس بیان پر سوشل میڈیا میں ان پر خاصی تنقید بھی ہوئی۔

سولوگیمی یا خود زوجگی کی بحث بھارت میں چند دنوں قبل اس وقت شروع ہوئی جب ایک پرائیوٹ کمپنی میں کام کرنے والی 24 سالہ چھما بندو نے اعلان کیا کہ وہ ایک مندر میں تمام ہندو رسوم و رواج پر عمل کرتے ہوئے اپنے آپ سے شادی کریں گی۔ ان کے مطابق مغربی ملکوں میں تو اس طرح کی اکا دکا شادی ہوتی رہی ہے تاہم گجرات بلکہ بھارت میں یہ اپنی نوعیت کی پہلی شادی ہو گی۔

چھما بندو نے شادی کی تقریب کے دوران آگ کے گرد سات پھیرے لگانے سے لے کر مانگ میں سیندور ڈالنے اور ہنی مون پر جانے تک کا پورا پلان بھی تیار کر رکھا ہے۔ بندو کا کہنا ہے کہ جب انہوں نے اپنے والدین کو اپنے فیصلے سے آگاہ کیا تو پہلے تو وہ حیرت زدہ رہ گئے لیکن بعد میں اجازت دے دی۔ ان کا مزید کہنا تھا کہ اس شادی کی راہ میں کوئی بھارتی قانون حائل نہیں ہو گا۔

چھما بندو نے بھارتی میڈیا سے بات کرتے ہوئے کہا کہ شادی کا مقصد یہ ہے کہ دو لوگوں کے درمیان پیار محبت پروان چڑھے۔ میں چونکہ خود سے محبت کرتی ہوں اس لیے میں اپنے آپ سے شادی کرنا چاہتی ہوں۔

انہوں نے کہا،''خود سے شادی کرنا اپنے آپ سے ایک وعدہ ہے، ایک وعدہ جس میں آپ ہمیشہ اپنے لیے موجود رہیں۔ ایک ایسا وعدہ جس میں آپ اپنے لیے ایک ایسی زندگی اور لائف اسٹائل منتخب کریں جو آپ کو آگے بڑھنے اور ترقی کرنے میں مدد کرے تا کہ آپ زندہ دلی، خوبصورت اور اندر سے مطمئن اور خوش زندگی گزار سکیں۔‘‘

چھما بندو کے سولوگیمی کے اعلان کے بعد سے ہی بھارت میں سوشل میڈیا پر گرما گرم بحث جاری ہے۔ کچھ لوگوں کا کہنا ہے کہ یہ خود کو نمایاں کرنے کی محض ایک کوشش ہے کیونکہ اس طرح کی شادی بے معنی ہے۔ لیکن بندو کا کہنا ہے وہ یہ دکھانا چاہتی ہیں کہ خواتین کی بھی اپنی ایک حیثیت ہے۔

ماہرین قانون کے مطابق بھارت میں سولوگیمی کو قانونی منظوری حاصل نہیں ہے۔ بھارتی قانون کے مطابق کوئی شخص اپنی ذات سے شادی نہیں کرسکتا۔ شادی دو افراد کے درمیان ہی ہو سکتی ہے۔

بعض صارفین نے سوشل میڈیا پر لکھا کہ چھما بندو دراصل خاندان کی ذمہ داری اٹھانے سے راہ فرار اختیار کر رہی ہیں۔ ایک شخص نے لکھا کہ اگر شوہر نہیں ہوگا تو وہ جھگڑا کس سے کریں گی۔ یا اگر کبھی روٹھ گئیں تو انہیں کون منائے گا؟

چھما بندو اس طرح کے تبصروں کے جواب میں کہتی ہیں،''میں سولوگیمی کو ایک معمول کی چیز ثابت کرنا چاہتی ہوں۔ میں یہ بتانا چاہتی ہوں کہ آپ اس دنیا میں اکیلے آئے تھے اور اکیلے ہی جائیں گے تو ایسے میں آپ کو آپ سے زیادہ پیار کون کرسکتا ہے۔ اگر آپ گریں گے تو خود کو سنبھالنے والے آپ ہی ہوں گے۔‘‘

خیال رہے کہ دنیا کے کئی ملکوں میں سولوگیمی کے واقعات ہوتے رہے ہیں۔ اس پر ایک کینیڈین ویب سیریز بھی بنائی گئی تھی۔ گزشتہ برس برازیل کی ماڈل کرس گالیرا نے سولوگیمی کی تھی تاہم دلچسپ بات یہ ہے کہ بعد میں انہوں نے اپنے آپ سے طلاق بھی لے لی۔