حج 2026 کے لیے درخواست فارم جمع کرنے کی تاریخ میں توسیع، اب 7 اگست تک بھرے جا سکیں گے آن لائن فارم

نئی دہلی: حج بیت اللہ 2026 کے لیے آن لائن درخواست فارم جمع کرنے کی آخری تاریخ میں 7 اگست تک توسیع کر دی گئی ہے۔ دہلی اسٹیٹ حج کمیٹی کی چیئرپرسن کوثر جہاں نے اس تعلق سے اپنے بیان میں کہا ہے کہ عازمین کرام کی جانب سے موصول متواتر درخواستو ں کی بنیاد پر تمام ریاستی حج کمیٹیوں کی تجاویز کے مطابق حج درخواست فارم جمع کرنے کی آخری تاریخ میں یہ توسیع ایک خوش آئند فیصلہ ہے۔ اب ایسے تمام حج درخواست دہندگان جو کسی بھی وجہ سے ابھی تک درخواست  نہیں جمع کرا سکے ہیں، اس سنہری موقع کا فائدہ اٹھاتے ہوئے جلد سے جلد اپنے فارم جمع کرا دیں اور اس کے لیے دہلی اسٹیٹ حج کمیٹی کے دفتر، حج منزل میں عازمین حج کے لیے درخواست فارم بھرنے کی سہولیات بدستور جاری رہیں گی۔

حج کمیٹی کے ایگزیکٹیو آفیسر اشفاق احمد عارفی نے تفصیلات جاری کرتے ہوئے بتایا کہ حج کمیٹی آف انڈیا کے سی ای او کی جانب سے ریاستی حج کمیٹیوں کے ایگزیکٹیو آفیسران کے نام جاری گشتی مراسلہ کے ذریعے حج فارم جمع کرنے کی آخری تاریخ میں توسیع کی منظوری کی اطلاع موصول ہونے کے بعد دہلی اسٹیٹ حج کمیٹی کی طرف سے یہ اطلاع مختلف ذرائع سے عازمین تک پہونچا دی گئی ہیں۔ مزید یہ کہ اس کے بعد حج فارم بھرنے کی مدت میں آئندہ کوئی توسیع ممکن نہیں ہوگی اور 7 اگست کی آخری تاریخ کے بعد جلد ہی عازمین کے انتخاب کے لیے آن لائن قرعہ اندازی کا عمل مکمل کر لیا جائے گا اور قرعہ اندازی میں منتخب ہونے والے عازمین کو 20 اگست 2025 تک 1,52,300 روپیے کی پیشگی رقم فوری طور پر جمع کرانی ہوگی۔

اشفاق احمد عارفی کی جانب سے جاری دفتری تفصیلات کے مطابق دہلی اسٹیٹ حج کمیٹی میں اب تک 3892 حج درخواست فارم جمع ہو چکے ہیں۔ ان درخواستوں میں مختصر مدتی حج کے لیے 556 جبکہ مخصوص زمرہ 65 سال اور اس سے زائد عمر کے 256، بغیر محرم خواتین عازمین کے مخصوص زمرہ میں 17 اور عمومی زمرہ میں موصول درخواستوں کی تعداد 3619 ہے۔