’اردو کی تعلیم کو جدید اور دلچسپ بنانے کی ضرورت‘، علی گڑھ مسلم یونیورسٹی کے زیر اہتمام ہفت روزہ ریفریشر کورس اختتام پذیر

علی گڑھ: آج یہاں اردو اکادمی، علی گڑھ مسلم یونیورسٹی کے زیر اہتمام ہفت روزہ اردو ریفریشر کورس بعنوان ’اردو زبان و ادب کی تدریس: جدید طریقہ کار اور امکانات‘ کی اختتامی تقریب کا انعقاد عمل میں آیا۔ اس کی صدارت اردو اکادمی کے ڈائریکٹر پروفیسر قمر الہدیٰ فریدی نے کی، جبکہ مہمان خصوصی کی حیثیت سے ڈین اسٹوڈینٹس ویلفیئر پروفیسر رفیع الدین اور بطور مہمان ذی وقار ڈین آف سوشل سائنس پروفیسر شافع قدوائی نے شرکت کی۔

ریفریشر کورس کی اختتامی تقریب سے خطاب کرتے ہوئے مہمان خصوصی پروفسر رفیع الدین نے کہا کہ اسکولوں میں جدید طریقۂ تدریس سے اردو کے طلبا و طالبات کی دلچسپی میں اضافہ ہوگا۔ اس لئے آج جدید اور دلچسپ طریقے سے اردو کی تعلیم کو یقینی بنانے کی ضرورت ہے۔ انہوں نے مزید کہا کہ ہمارے معاشرے کو استاد سے بہت سی امیدیں وابستہ رہتی ہیں، اس لیے ان کی ذمہ داریاں بہت بڑھ جاتی ہیں۔

پروفیسر شافع قدوائی نے ہفت روزہ ریفریشر کورس کی کامیابی پر مبارکباد پیش کرتے ہوئے کہا کہ اردو کی تعلیم اور فروغ کے لیے نرسری سے لے کر اعلی تعلیم تک اردو کے تدریسی نظام کو بہتر سے بہتر کیا جانا چاہیے۔ انہوں نے اردو کے نصابات کو بھی بہتر بنانے پر زور دیا۔ انہوں نے مزید کہا کہ استاد ہونا باعث افتخار بات ہے۔ استاد وہی اچھا ہے جسے اپنی لاعلمی کے حدود کا پتہ ہو۔

پروفیسر قمر الہدیٰ فریدی نے اپنی صدارتی تقریر میں کہا کہ علی گڑھ مسلم یونیورسٹی سے وابستہ 10 اسکولوں کے اردو اساتذہ نے اس ریفریشر کورس میں حصہ لیا اور اردو تدریس کے جدید طریقہ کار سے مستفید ہوئے۔ ہماری یہ ہمیشہ کوشش رہے گی کہ اردو کے اساتذہ کے لیے اس طرح کے تربیتی پروگراموں کا انعقاد عمل میں آتا رہے۔ انہوں نے مزید کہا کہ استاد کو چاہیے کہ اپنے شوق کو ہی اپنا پیشہ بنا لیں۔

ڈاکٹر مشتاق صدف نے نظامت کے فرائض انجام دیتے ہوئے بتایا کہ اس ریفریشر کورس میں اردو کے 11 سینئر اساتذہ نے مختلف موضوعات پر لیکچرز دیے۔ ڈاکٹر رفیع الدین نے تمام شرکاء کا شکریہ ادا کرتے ہوئے بتایا کہ یہ ریفریشر کورس 30 جنوری سے 5 فروری تک عمل میں آیا۔ اس موقع نگہت وحید نے بھی اظہار خیال کیا۔ ابو حمزہ اور ہما انور نے نظمیں پیش کیں، جبکہ ڈاکٹر راشد عزیز، فرحین، ڈاکٹر عرفان احمد ندوی سمیت اردو کے ریسرچ اسکالرز نے بطور خاص شرکت کی۔