پاکستان: گیہوں بحران کے پیش نظر پنجاب میں دفعہ 144 لگانے کا فیصلہ، 30 دنوں تک رہے گا نافذ!

پاکستان میں سیلاب نے تباہی مچا رکھی ہے۔ 850 سے زائد افراد ہلاک ہو چکے ہیں اور سینکڑوں زخمی بھی ہوئے ہیں۔ ہزاروں افراد بے گھر ہو کر کھلے آسمان کے نیچے زندگی گزارنے کو مجبور ہیں اور فصلوں کی بربادی بھی بڑے پیمانے پر ہوئی ہے۔ اس درمیان پنجاب حکومت نے گیہوں بحران کو پیش نظر رکھتے ہوئے ایک انتہائی اہم قدم اٹھایا ہے۔ حکومت نے گیہوں سے متعلق پورے پنجاب میں دفعہ 144 نافذ کر دیا ہے۔

حکومت پنجاب کا کہنا ہے کہ سیلاب کی وجہ سے آٹا کا بحران پیدا ہونے کا اندیشہ بہت بڑھ گیا ہے۔ اس لیے دفعہ 144 نافذ کرنے جیسا قدم اٹھانا پڑا۔ پاکستان واقع پنجاب کی 3 ندیوں میں اس وقت طغیانی دیکھنے کو مل رہی ہے، جس کی وجہ سے سیلاب نے خطرناک صورت اختیار کر لی ہے۔

بہرحال، پاکستانی نیوز چینل ’اے آر وائی نیوز‘ کے مطابق گیہوں سے متعلق دفعہ 144 نافذ ہوتے ہی پورے پنجاب میں چارہ مل کے باہر سیکورٹی فورسز کی تعیناتی کر دی گئی ہے۔ حکومت کو لگتا ہے کہ گیہوں کا سب سے زیادہ استعمال چارہ مل میں ہی کیا جاتا ہے۔ یہاں رکھے گئے گیہوں سے مختلف مصنوعات بنا کر مویشیوں کے کھانے کا چارہ تیار کیا جاتا ہے۔ یہی وجہ ہے کہ آنے والے دنوں میں آٹا بحران کا اندیشہ پیدا ہو رہا ہے۔

پنجاب حکومت نے اپنے حکم میں کہا ہے کہ ممکنہ آٹا بحران سے بچنے کے لیے آئندہ 30 دنوں کے لیے گیہوں سے متعلق دفعہ 144 نافذ کیا جا رہا ہے۔ اس حکم کے بعد پاکستان کے شہری اب گیہوں کو صرف آٹا مل میں ہی لے جا سکتے ہیں۔ حکومت کے ترجمان کا کہنا ہے کہ موجودہ وقت میں پنجاب کے پاس 104184 میٹرک ٹن گیہوں ہی بچا ہے۔ جس طریقے سے پاکستان میں جیسا سیلاب آیا ہے، اس سے نہیں لگ رہا کہ اس مرتبہ گیہوں کا پروڈکشن ہو پائے گا۔

بتایا جاتا ہے کہ حکومت نے گیہوں کی قیمتوں میں اضافہ روکنے کے مقصد سے دفعہ 144 نافذ کرنے جیسا قدم اٹھایا ہے۔ پنجاب حکومت کا کہنا ہے کہ اسے اطلاع ملی ہے، لوگ مرغی پروری اور دیگر مویشی پروری کے لیے گیہوں کا استعمال کرتے ہیں۔ ایسے میں گیہوں کا خرچ زیادہ بڑھ سکتا ہے، اس لیے گیہوں سے متعلق دفعہ 144 نافذ کرنا ضروری سمجھا گیا۔ میڈیا رپورٹس میں گیہوں کی قیمتیں مستقل بڑھنے کی خبریں بھی سامنے آ رہی ہیں۔ موصولہ اطلاع کے مطابق یکم اگست 2025 کو پاکستان کے پنجاب علاقہ میں گیہوں 35 روپے کلو فروخت ہو رہا تھا، جو یکم ستمبر 2025 کو 97 روپے فی کلو ہو گیا۔ یہ اضافہ تقریباً 3 گنا ہے، جو موجودہ فکر انگیز حالات کی طرف واضح اشارہ کر رہا ہے۔