پاکستان میں زبردست مہنگائی، ٹماٹر 500 روپے، پیاز 300 روپے اور لیموں 400 روپے فی کلو

پاکستان میں سیلاب سے فصلوں کو بھاری نقصان پہنچنے کے بعد لاہور میں سبزیوں کی قیمتیں آسمان کو چھونے لگی ہیں اور یہاں ٹماٹر کی قیمت 500 روپے فی کلو تک پہنچ گئی ہے۔ سماء ٹی وی کی رپورٹ کے مطابق سیلاب سے سپلائی چین متاثر ہونے کے بعد دکانداروں نے منمانی قیمتیں مقرر کر دیں ہیں۔ پیاز 300 روپے فی کلو اور لیموں 400 روپے فی کلو فروخت ہو رہا ہے۔

سما ٹی وی کی رپورٹ کے مطابق سرکاری نرخ سے ٹماٹر کی قیمت 80 روپے فی کلو سے کم از کم چھ گنا زیادہ ہے، جب کہ پیاز 61 روپے فی کلو کے سرکاری نرخ سے پانچ گنا زیادہ فروخت ہو رہی ہے۔ ادرک اور لہسن کی قیمتوں میں بھی اضافہ ہوا ہے۔ ایک خریدار نے سما ٹی وی کو بتایا کہ اب غریب آدمی صرف ٹماٹر دیکھ سکتا ہے، خرید نہیں سکتا۔ انہوں نے مزید کہا کہ جو پیاز کبھی 100 روپے کلو سے اوپر نہیں بکتا تھا، اب وہ 250 یا 300 روپے میں بک رہا ہے۔

سما ٹی وی کی رپورٹ کے مطابق سیلاب اور دریاؤں میں آئی طغیانی نے پاکستان میں تباہی مچا دی ہے، ابتدائی اندازوں کے مطابق ملک کو پہلے ہی 5.5 بلین ڈالر کا نقصان ہو چکا ہے۔ صوبہ سندھ اور پنجاب میں گنے اور کپاس کی فصلیں مکمل طور پر تباہ ہو گئی ہیں، جبکہ پیاز، ٹماٹر اور خریف مرچ کو جزوی نقصان پہنچا ہے۔ صرف کپاس کی فصل کے نقصان کا تخمینہ 2.6 بلین ڈالر لگایا گیا ہے۔ ماہرین کا خیال ہے کہ پاکستان کی ٹیکسٹائل اور چینی کی برآمدات ایک ارب ڈالر تک گر سکتی ہے۔

سماء ٹی وی کی رپورٹ کے مطابق سندھ میں سرکاری گوداموں میں ذخیرہ کی گئی کم از کم 20 لاکھ ٹن گندم بارشوں اور سیلاب کے باعث خراب ہو گئی ہے، جس سے ملک میں غذائی تحفظ کو خطرہ ہے۔ زراعت کے شعبے میں تباہی کا مطلب یہ ہے کہ پاکستان کو نہ صرف صنعتوں کے لیے سپلائی کی کمی کا سامنا کرنا پڑے گا بلکہ ملک میں بیج کا بحران بھی ہو سکتا ہے۔