مذہب اسلام اپنانے والی مشہور ہستی روسمنڈ براؤن کے ’ٹوئرکنگ‘ پر لوگوں کو اعتراض، روسمنڈ نے ظاہر کیا شدید رد عمل

کچھ ماہ قبل گھانا کی مشہور ہستی روسمنڈ براوایلیڈن عرف اکواپیم پولو نے عیسائی مذہب ترک کر اسلام اختیار کر لیا تھا۔ اس کے بعد سے انھوں نے عریانیت ظاہر کرنے والے کپڑے پہننے سے سختی کے ساتھ منع کر دیا تھا اور کہا تھا کہ وہ اسلامی تہذیب کو پسند کرتی ہیں اس لیے یہ مذہب اپنایا۔ اب کچھ لوگ ان کے ٹوئرکنگ (ایک طرح کا ڈانس اسٹیپ) پر اعتراض ظاہر کر رہے ہیں۔ لوگوں کا کہنا ہے کہ وہ اس طرح ڈانس کرنا چھوڑ دیں کیونکہ یہ اسلام میں مناسب نہیں۔

اس طرح کے اعتراضات پر اکواپیم پولو کا شدید رد عمل سامنے آیا ہے۔ انھوں نے معترضین پر ناراضگی ظاہر کرتے ہوئے کہا کہ ’’اگر آپ چاہتے ہیں کہ میں ایسا نہ کروں تو آپ کو مجھے کوئی ملازمت دینی ہوگی، جس سے کہ میں خود کو مصروف رکھ سکوں۔‘‘ اکواپیم پولو یعنی روسمنڈ یہ بھی کہتی ہیں کہ ’’میں ڈانس نہیں روکوں گی، کیونکہ اسی کے ذریعہ میں اپنا گزارا کرتی ہوں۔ ٹوئرکنگ اس لیے بھی نہیں روکوں گی کیونکہ یہ ایک ڈانس کا فارم اور ورزش کا اچھا طریقہ ہے۔‘‘

قابل ذکر ہے کہ اکواپیم پولو نے ایک مسلم شخص سے شادی کی ہے اور ان سے ایک بیٹا بھی ہے۔ اس بچے کے بارے میں اکواپیم نے بتایا کہ وہ مسلم ہے اور اس کی پرورش مسلم لڑکے کی طرح ہی کریں گی۔ اکواپیم نے یہ بھی بتایا کہ وہ اپنے بیٹے کو ایسی جگہوں پر نہیں لے جاتی تھیں جہاں اسلام کی تعلیم دی جاتی ہو، ایسے میں اب بیٹے کے اسلام سے جڑے سوالوں سے بچنے کے لیے وہ خود ہی مسلمان بن گئیں، جس سے اب آرام سے اپنے بیٹے کو اسلامی تعلیم دے پائیں گی۔