بی سی سی آئی کی سالانہ معاہدہ لسٹ جاری، کوہلی اور روہت گریڈ اے سے باہر، اے پلس ختم!

بھارتی کرکٹ کنٹرول بورڈ(بی سی سی آئی) نے پیر کو 26- 2025 سیزن کے لیے سینئر مردوں اور خواتین کھلاڑیوں کے سالانہ معاہدوں کا اعلان کیا، جس میں وراٹ کوہلی اور روہت شرما کو گریڈ بی میں رکھا گیا ہے۔ اس کے ساتھ ہی بورڈ نے 7 کروڑ کی رٹنیرشپ والی اے پلس گریڈ ختم کردی ہے۔ یہ کانٹریکٹ یکم اکتوبر 2025 سے 30 ستمبر 2026 تک موثر رہے گا۔

بی سی سی آئی نے پیر کو اے، بی اور سی زمرے میں 30 مردوں اور 21 خواتین کرکٹروں کے سالانہ معاہدوں کا اعلان کیا۔ یہ معاہدہ ہندوستانی کرکٹ میں ایک واضح نسل جاتی تبدیلی کی عکاسی کرتا ہے، جس میں شبھمن گل کو جسپریت بمراہ اور رویندر جڈیجا کے ساتھ سینئر مردوں کی ٹیم کے لیے گریڈ اے میں شامل کیا گیا ہے۔ بمراہ ٹاپ گریڈ میں واحد تیز گیند باز بنے ہوئے ہیں جو تمام حالات میں ان کی اہمیت کو ظاہر کرتا ہے۔ رویندر جڈیجا کا گریڈ اے میں برقرار رہنا ایک آل راؤنڈر کے طور پر ان کی قدر کی عکاسی کرتا ہے۔

گریڈ سی کی فہرست سب سے بڑی ہے، جس میں ابھرتی ہوئی صلاحیتوں اور فارمیٹ ماہرین کا امتزاج ہے۔ اس میں اکشر پٹیل، تلک ورما، رنکو سنگھ، ارشدیپ سنگھ، سنجو سیمسن، یشسوی جیسوال، سوریہ کمار یادو، شریئس آئیر اور ریتوراج گائیکواڑ جیسے کھلاڑی شامل ہیں۔ دھرو جوریل، ہرشت رانا، نتیش کمار ریڈی اور سائی سدرشن جیسے نوجوانوں کو بھی مسلسل اچھی کارکردگی کا انعام دیا گیا ہے۔ وہیں کے ایل راہل، محمد سراج، ہاردک پانڈیا، رشبھ پنت، شریئس ایئر، کلدیپ یادو اور یشسوی جیسوال جیسے کھلاڑیوں کو گریڈ بی میں جگہ ملی ہے۔

پچھلے مرحلے میں 34 کھلاڑیوں کو کنٹریکٹ دیا گیا تھا لیکن اس بار لسٹ میں صرف 30 کھلاڑیوں کے نام شامل ہیں۔ تجربہ کار تیز گیند باز محمد شامی، وکٹ کیپر بلے باز ایشان کشن، تیز گیندباز مکیش کمار اور ممبئی کے بلے باز سرفراز خان کے نام فہرست میں نہیں ہیں۔ اس کی وجہ یہی ہے کہ انہوں نے اس مرحلے میں کسی بھی فارمیٹ میں ایک بھی بین الاقوامی میچ نہیں کھیلا ہے۔ شامی کے باہر ہونے کا مطلب ہے کہ ان کی ہندوستانی ٹیم میں واپسی کے راستے تقریباً بند ہو گئے ہیں۔ ایشان نے ٹی 20 فارمیٹ میں واپسی کی ہے لیکن وہ نئے مرحلے میں ہوئی ہے۔ مکیش گزشتہ سیزن میں نہیں کھیلے تھے۔ وہیں سرفراز آسٹریلیا میں ٹیم کا حصہ تھے لیکن ایک بھی میچ نہیں کھیلے۔

گریڈ اے: شبمن گل، جسپریت بمراہ اور رویندرا جدیجا۔ گریڈ بی: واشنگٹن سندر، روہت شرما، ورات کوہلی، کے ایل راہل، محمد سراج، ہاردک پانڈیا، رشبھ پنت، کلدیپ یادیو، یشسوی جیسوال، سوریہ کمار یادو اور شریئس ایئر۔ گریڈ سی: اکشر پٹیل، تلک ورما، رنکو سنگھ، شیوم دوبے، سنجو سیمسن، ارشدیپ سنگھ، پرسدھ کرشنا، آکاش دیپ، دھرو جوریل، ہرشت رانا، ورون چکرورتی، نتیش کمار ریڈی، ابھیشیک شرما، سائی سدرشن، روی بشنوئی اور رتوراج گائکواڈ۔

دوسری جانب خواتین میں ہرمن پریت کور، اسمرتی مندھانا، جیمیمہ روڈریگس اور دپتی شرما گریڈ اے فہرست میں شامل ہیں۔ خواتین کے معاہدوں میں کئی نوجوان نام بھی شامل ہیں۔ شفالی ورما، رچا گھوش، اسنیہہ رانا، یستیکا بھاٹیہ اور ہرلین دیول جیسی کھلاڑی گریڈ بی اور گروپ سی میں شامل ہیں، جبکہ اوما چھتری، کرانتی گوڈ اور کشوی گوتم جیسے نئے چہروں کو سینٹرل کنٹریکٹ ملا ہے۔

ٹیم انڈیا (سینئر خواتین) کے سالانہ معاہدے 2025-26 کے مطابق: گریڈ اے: ہرمن پریت کور، اسمرتی مندھانا، جیمیمہ روڈریگس اور دیپتی شرما۔ گریڈ بی: رینوکا ٹھاکر، شیفالی ورما، ریچا گھوش اور اسنیہہ رانا۔ گریڈ سی: رادھا یادو، امن جوت کور، پرتیکا راول، کرانتی گوڑ، اوما چھیتری، اروندھتی ریڈی، شری چرنی، یاستیکا بھاٹیہ، ہرلین دیول، کاشوی گوتم، جی کملینی، ویشنوی شرما اور تیجل حسابنیس۔