ہندوستان نے شام سے اپنے 75 شہریوں کو نکالا، لبنان کے راستے وطن واپس آئیں گے

باغی افواج کی جانب سے بشار الاسد کی حکومت کا تختہ الٹنے کے دو دن بعد، ہندوستان  نے10 دسمبر کو شام سے 75 ہندوستانی شہریوں کو نکالا۔ وزارت خارجہ نے کہا کہ سیکورٹی صورتحال کا جائزہ لینے کے بعد دمشق اور بیروت میں ہندوستانی سفارت خانوں نے انخلاء کے عمل کو مربوط کیا۔

دیر رات جاری کردہ ایک بیان میں کہا گیا ہے، "حکومت ہند نے آج شام سے 75 ہندوستانی شہریوں کو حالیہ پیش رفت کے بعد نکالا ہے۔" اس نے کہا، "ان نکالے جانے والوں میں جموں و کشمیر کے 44 زائرین بھی شامل ہیں جو سیدہ زینب میں پھنسے ہوئے تھے۔ تمام ہندوستانی شہری بحفاظت لبنان پہنچ گئے ہیں اور دستیاب تجارتی پروازوں سے ہندوستان واپس جائیں گے"۔

وزارت خارجہ نے کہا کہ حکومت بیرون ملک مقیم ہندوستانی شہریوں کی حفاظت کو اولین ترجیح دیتی ہے۔ "شام میں رہنے والے ہندوستانی شہریوں کو مشورہ دیا جاتا ہے کہ وہ دمشق میں ہندوستانی سفارت خانے سے رابطے میں رہیں"۔ وزارت خارجہ نے کہا، "حکومت صورتحال پر گہری نظر رکھے گی۔"

شام کے باغی گروپوں نے لازمی سروس کے لیے بھرتی کیے گئے تمام فوجی اہلکاروں کے لیے عام معافی کا اعلان کیا ہے۔ ایک بیان میں، باغی گروپ کے ملٹری آپریشن ڈیپارٹمنٹ نے اعلان کیا، "ہم لازمی سروس کے تحت تمام فوجی اہلکاروں کو عام معافی دیتے ہیں۔" انہیں تحفظ کی ضمانت دی گئی ہے، اور ان کے خلاف کسی بھی قسم کی جارحیت ممنوع ہے۔