ایران میں اسٹار لنک انٹرنیٹ کے خلاف سخت حکومتی کریک ڈاؤن جاری

ایران میں جاری احتجاجی مظاہروں کے دوران حکومت کی جانب سے انٹرنیٹ بند کیے جانے کے بعد اب سیٹلائیٹ انٹرنیٹ سروس اسٹار لنک کے خلاف بھی کریک ڈاؤن شروع کردیا گیا۔گزشتہ ہفتے ایرانی حکومت نے ملک میں زیادہ تر انٹرنیٹ کنکشن بند کردیے تھے جبکہ فون کالز اور ٹیکسٹ پیغامات بھیجنے کی سہولت بھی محدود کردی گئی تھی۔

امریکی اخبار کے مطابق انٹرنیٹ تک بلا تعطل رسائی صرف حکومت، اس کے میڈیا اداروں اور حکومت کے حامیوں کو حاصل ہے۔ ایک امریکی این جی او نیٹ فریڈم پاینیرز کے شریک بانی مہدی یحییٰ نیجاد نے امریکی اخبار کو بتایا کہ ایرانی حکومت کی جانب سے سروس میں خلل ڈالنے کی کوششوں سے اسٹارلنک کی رفتار ضرور متاثر ہوئی ہے تاہم اسے مکمل طور پر بند نہیں کیا جا سکا۔

ایران میں اسٹارلنک ٹرمینلز غیر قانونی ہیں اور انہیں خفیہ طور پر ملک میں لایا جاتا ہے۔ یہ ٹرمینلز 2022 کے احتجاجی مظاہروں کے بعد بڑی تعداد میں سامنے آئے تھے۔ مہدی یحییٰ نیجاد کے مطابق ان کی تنظیم نے ایران میں غیر سرکاری اداروں کو ہزاروں اسٹارلنک کٹس فراہم کیں جبکہ دیگر کٹس تجارتی ذرائع کے ذریعے ملک میں لائی گئیں۔

تہران میں ایک صارف نے اسٹارلنک کے ذریعہ امریکی اخبار کو بتایا کہ اس نے اپنے رشتہ داروں کی بنائی ہوئی احتجاج کی ویڈیوز اپ لوڈ کیں اور پھر انہیں بیرونِ ملک افراد کو بھیجا، جنہوں نے انہیں سوشل میڈیا پر شیئر کیا۔ اس صارف کا کہنا تھا کہ جن لوگوں کے پاس اسٹارلنک ہے وہ اس کا کھلے عام ذکر نہیں کرتے اور صرف قابلِ اعتماد افراد کو ہی ویڈیوز بھیجتے ہیں، کیونکہ حکومت ان کی تلاش میں ہے۔

یاد رہےکہ ایران میں حکومت مخالف مظاہرے جاری ہیں اور امریکی انسانی حقوق تنظیم کے دعوے کے مطابق دو ہفتے سے جاری مظاہروں میں 490 افراد ہلاک ہوچکے ہیں۔امریکی صدر نے اس سے قبل مظاہرین کو قتل کرنے کی صورت میں ایرانی حکومت کو سخت وارننگ جاری کی تھی۔ گزشتہ روز بھی امریکی صدر نے کہا تھا کہ ایران کے خلاف مختلف آپشنز پر غور کر رہے ہیں جس میں فوجی کارروائی بھی شامل ہے۔