امریکہ کے ٹیکساس میں سیلاب کا قہر، اب تک 15 بچوں سمیت 50 اموات، وزیر اعظم مودی کا اظہار غم

امریکی ریاست ٹیکساس کے کیر کاؤنٹی میں سیلاب سے زبردست تباہی مچی ہے۔ یہاں سیلاب سے مرنے والوں کی تعداد بڑھ کر 50 پہنچ گئی ہے، جس میں 15 بچے بھی شامل ہیں۔ بتایا جا رہا ہے کہ 20 سے زیادہ بچے لاپتہ ہو گئے ہیں۔ یہ بچے گواڈالوپ ندی کے کنارے سمر کیمپ میں حصہ لینے کے لیے گئے تھے۔ ہندوستانی وزیر اعظم نریندر مودی نے ٹیکساس میں آئے تباہ کن سیلاب میں لوگوں کی جان جانے، خاص کر بچوں کی موت پر گہرے صدمے کا اظہار کیا ہے۔

وزیر اعظم مودی نے سوشل میڈیا پلیٹ فارم ’ایکس‘ پر ایک پوسٹ میں کہا، ’’ٹیکساس میں آئے تباہ کن سیلاب میں لوگوں کی موت، خاص کر بچوں کی جان جانے کے بارے میں سن کر بہت صدمہ پہنچا ہے۔ امریکی حکومت اور غمزدہ خاندان کے تئیں ہماری ہمدردی۔‘‘

رپورٹ کے مطابق ٹیکساس کے لیفٹیننٹ گورنر ڈین پیٹرک نے ایک پریس کانفرنس میں بتایا کہ ٹیکساس کے ایک پرائیویٹ کرشچین سمر کیمپ مسٹک میں تقریباً 23 بچے ابھی بھی لاپتہ ہیں۔ اس کیمپ میں تقریباً 750 بچے رہتے ہیں۔ انہوں نے کہا کہ کم سے کم 14 ہیلی کاپٹر، 12 ڈرون اور 500 سے زیادہ لوگ کیمپ کے آس پاس تلاشی مہم چلا رہے ہیں۔ اس دوران کئی نوجوانوں اور بچوں کو بچایا گیا ہے۔

کیر کاؤنٹی کے شیرف لیری لئیتھا نے ایک پریس کانفرنس میں بتایا کہ اس شدید سیلاب کی وجہ سے کاؤنٹی میں کم سے کم 50 لوگوں کی موت ہوئی ہے۔ جبکہ کئی لوگ ابھی بھی لاپتہ ہیں۔ لئیتھا نے کہا کہ انہیں خدشہ ہے کہ کاؤنٹی میں اور بھی موتیں درج کی جا سکتی ہیں۔ کیروِلے سٹی منیجر ڈالٹن رائس نے کہا کہ ہم ابھی بھی فعال طور سے ان لوگوں کی تلاش کر رہے ہیں جو باہر ہیں۔ انہیں مدد کی ضرورت ہے۔

مقامی وقت کے مطابق صبح 4 بجے (ہندوستانی وقت کے مطابق صبح 9 بجے) نیشنل ویدر سروس نے فلیش فلڈ کی وارننگ دی ہے۔ ندی کے کنارے رہنے والے لوگوں اور کیمپ میں رہنے والوں کے موبائل فون پر ایمرجنسی الرٹ بھی بھیجا گیا ہے۔ سروس نے یہ بھی انتباہ کیا ہے کہ گواڈالوپ ندی میں پانی کی ایک بڑی لہر آگے بڑھ رہی ہے جس سے سیلاب کی حالت مزید سنگین ہو سکتی ہے۔

قومی موسم سروس نے بتایا کہ گواڈالوپ ندی کی آبی سطح کیر کاؤنٹی میں راتوں رات 7.5 فٹ (تقریباً 2.3 میٹر) سے بڑھ کر تقریباً 30 منٹ تک پہنچ گئی ہے۔ آن لائن ویڈیو میں دیکھا جا سکتاہے کہ کاؤنٹی میں گواڈالوپ ندی کے تیزی سے بڑھنے کی وجہ سے کاریں، کیمپر اور موبائل گھر بہہ گئے۔