’عام انتخابات وقت پرہی ہوں گے‘: محمد یونس کا اعلان

بنگلہ دیش حکومت کے چیف ایڈوائزر پروفیسر محمد یونس نے پیر کے روز اس بات کا اعادہ کیا کہ عام انتخابات بارہ فروری کو مقررہ وقت پرہی ہوں گے۔انہوں نے کہا کہ ملک کے عوام اپنے ووٹ کا حق استعمال کرنے کے لیے بے تاب ہیں، جنہیں پچھلی آمرانہ حکومت نے چھین لیا تھا۔

پروفیسر یونس نے یہ بیان جنوبی اور وسطی ایشیا کے لیے امریکہ کے خصوصی ایلچی سرجیو گور سے ٹیلی فون پر گفتگو کے دوران دیا۔ اس گفتگو بحث میں بنگلہ دیش اور امریکہ کے درمیان تجارتی اور ٹیرف مذاکرات، آئندہ عام انتخابات، ملک میں جمہوری تبدیلی کے عمل اور نوجوان سیاسی کارکن شریف عثمان ہادی کے قتل جیسے مسائل کا احاطہ کیا گیا۔

ہندوستان میں امریکی سفیر سرجیو گور نے حالیہ ٹیرف مذاکرات میں پروفیسر یونس کی قیادت کی تعریف کی۔ انہوں نے وضاحت کی کہ ان کوششوں سے بنگلہ دیشی اشیا پر امریکہ کے باہمی محصولات کو 20 فیصد تک کم کر دیا گیا ہے۔ امریکی خصوصی ایلچی نے شہید عثمان ہادی کے حوالے سے بھی تبادلہ خیال کیا۔ چیف ایڈوائزر نے صورتحال کو سنگین قرار دیا۔

پروفیسر یونس نے کہا کہ معزول آمرانہ حکومت کے حامی مبینہ طور پر انتخابی عمل میں خلل ڈالنے کے لیے لاکھوں ڈالر خرچ کر رہے ہیں، اور ان کا مفرور رہنما تشدد کو ہوا دے رہا ہے۔ تاہم، انہوں نے زور دے کر کہا کہ عبوری حکومت کسی بھی چیلنج سے نمٹنے کے لیے پوری طرح تیار ہے۔

انہوں نے کہا کہ "انتخابات میں تقریباً 50 دن باقی ہیں، ہم آزادانہ، منصفانہ اور پرامن انتخابات کرانا چاہتے ہیں اور اسے یادگار بنانا چاہتے ہیں۔" کال کے دوران مشیر تجارت شیخ بشیر الدین، قومی سلامتی کے مشیر ڈاکٹر خلیل الرحمن، اور ایس ڈی جی کوآرڈینیٹر اور سینئر سیکرٹری لامیا مرشد بھی موجود تھے۔