کورونا کا نیا ویریئنٹ ’این بی 1.8.1‘ آیا سامنے، امریکہ میں کئی کیسز ریکارڈ

کورونا وائرس نے ایک بار پھر تیزی سے پھیلنا شروع کر دیا ہے۔ دنیا کے کئی ممالک میں کورونا کے بڑھتے کیسز نے تشویش پیدا کر دی ہے۔ ہندوستان میں بھی کورونا انفیکشن کے معاملے مستقل بڑھ رہے ہیں۔ ’جے این 1‘ ویریئنٹ کی وجہ سے ہندوستان میں کئی کیسز سامنے آ چکے ہیں، لیکن ایک نئے ویریئنٹ نے بھی خوف کا ماحول پیدا کر دیا ہے۔ اس نئے ویریئنٹ کا نام ہے ’این بی 1.8.1‘۔ اس ویریئنٹ سے متاثر کئی کیسز امریکہ میں سامنے آ چکے ہیں۔ پہلے ہی کورونا کے ’جے این 1‘ ویریئنٹ نے ہانگ کانگ، سنگاپور اور چین میں قہر برپا کر رکھا ہے، اب نئے ویریئنٹ سے تشویش میں اضافہ ہو گیا ہے۔

اچھی بات یہ ہے کہ نیا ویریئنٹ ’این بی 1.8.1‘ ابھی ہندوستان تک نہیں پہنچا ہے۔ ہندوستان کے ’جے این 1‘ کے ہی زیادہ معاملے سامنے آئے ہیں۔ یہ ویریئنٹ اومیکرون بی اے-2.86 کی ہی ایک شکل ہے۔ ماہرین کا کہنا ہے کہ ایک ساتھ 2 ویریئنٹ کا سامنے آنا خطرے کا اشارہ ہو سکتا ہے۔ حالانکہ ماہرین یہ بھی کہتے ہیں کہ یہ سبھی پچھلے ویریئنٹ کے ’ذیلی ویریئنٹس‘ ہیں، اس لیے گھبرانے کی ضرورت نہیں ہے۔

دراصل ہانگ کانگ، سنگاپور اور چین میں کورونا کے نئے ویریئنٹ ’جے این 1‘ کے معاملے مستقل بڑھ رہے ہیں۔ ہزاروں لوگ اس ویرئنٹ سے متاثر ہو چکے ہیں۔ بہت سے مریضوں کی موت بھی ہو چکی ہے۔ ہندوستان میں بھی ’جے این 1‘ کے 20 سے زیادہ معاملے سامنے آ چکے ہیں۔ اب چونکہ اس ویریئنٹ نے نئی شکل اختیار کر لی ہے، تو فکر لازمی ہے۔ نئے ویریئنٹ ’این بی 1.8.1‘ کے بارے میں بتایا جا رہا ہے کہ یہ چین سے امریکہ پہنچا ہے۔ امریکہ پہنچتے ہی اس ویریئنٹ نے اپنا اثر دکھانا شروع کر دیا ہے۔ سائنسداں اب یہ پتہ لگانے کی کوشش کر رہے ہیں کہ کیا یہ پہلے سے زیادہ متعدی اور فکر انگیز ہیں، یا پھر زیادہ خطرناک نہیں۔ یہ بھی پتہ کیا جا رہا ہے کہ ویکسین کا ان ویریئنٹس پر کیا اثر پڑے گا۔

وبائی امراض کے ماہر جگل کشور نے ایک میڈیا ادارہ سے بات کرتے ہوئے بتایا کہ ڈبلیو ایچ او نئے ویریئنٹ سمیت 6 ویریئنٹس کی مانیٹرنگ کر رہا ہے۔ سائنسداں اور طبی افسران نئے ویریئنٹ کے اثرات اور سنگینی کو سمجھنے کی کوشش کر رہے ہیں۔ حالانکہ ڈاکٹر جگل کشور کا کہنا ہے کہ ہندوستان میں فی الحال نئے ویریئنٹ کا کوئی خاص اثر نہیں ہے۔ انھوں نے بتایا کہ ڈبلیو ایچ او نے پہلے کہا تھا کہ ’جے این 1‘ اور اس کے جیسے ویریئنٹس میں مدافعتی نظام سے بچنے کی صلاحیت ہوتی ہے، لیکن اس بات کے ابھی تک کوئی ٹھوس ثبوت نہیں ملے ہیں۔ وہ مزید بتاتے ہیں کہ جو لوگ پہلے سے کسی سنگین بیماری میں مبتلا ہیں، انھیں اس ویریئنٹس کی زد میں آنے کا خطرہ سب سے زیادہ ہے۔ ان کے علاوہ بزرگوں اور بچوں کو بھی یہ ویریئنٹ متاثر کر سکتا ہے۔