اہم خبریں: نئے سال کے موقع پر دہلی پولیس نے 657 افراد کے چالان کاٹے

31 دسمبر کو نئے سال کے موقع پر دہلی ٹریفک پولیس نے 657 لوگوں کے چالان کیے۔ جن میں شراب پیکر گاڑی چلانے کے لیے 36، خطرناک ڈرائیونگ کے لیے 103، ہیلمٹ کے بغیر سواری کے لیے 370، بائیک پر تین افراد کی سواری کے لیے 48 اور ٹریفک سے متعلق دیگر جرائم کے لیے 100 چالان کاٹے گئے۔

وزیر اعظم نریندر مودی نے آج پردھان منتری کسان سمان ندھی کی تقریباً 20 ہزار کروڑ روپے سے زیادہ کی رقم ملک کے تقریباً 10 کروڑ کسانوں کو ان کے بینک کھاتوں میں منتقل کر دی۔ وزیر اعظم مودی نے آج پردھان منتری کسان سمان ندھی کی 10ویں قسط جاری کی۔ خیال رہے کہ اس سے قبل کسانوں کو ایک لاکھ 60 ہزار کروڑ روپے کی مالی امداد دی جا چکی ہے۔

نئے سال کے موقع پر صارفین کو اس وقت کچھ راحت حاصل ہوئی جب تیل مارکیٹنگ کمپنیوں نے یکم جنوری 2022 کو 19 کلوگرام والے کمرشیل (تجارتی) ایل پی جی سلنڈر کی قیمتوں میں 102.50 روپے کی کمی کر دی۔ میڈیا رپورٹ کے مطالبق آج سے دہلی میں 19 کلوگرام تجارتی سلنڈر کی قیمت 1998.50 روپے ہو گئی۔

ہندوستان میں کورونا کے معاملوں میں زبردست اضافہ درج کیا جا رہا ہے۔ مرکزی وزارت صحت کے مطابق گزشتہ 24 گھنٹوں کے دوران ملک بھر سے 22775 نئے کیسز درج کئے گئے۔ اس دوران 8949 مریضوں نے شفایابی حاصل کر لی جبکہ 406 کی جان چلی گئی۔ وہیں، ملک بھر میں کورونا کے ویرینٹ اومیکرون کے معاملوں کی تعداد 1431 ہو گئی ہے۔

ملک میں 3 جنوری سے 15-18 عمر کے بچوں کی ٹیکہ کاری کے لئے کووِن ایپ پر رجسٹریشن کا آج سے آغاز ہو گیا۔ مرکزی وزیر صحت منسکھ منڈاویا نے یہ اطلاع دی۔ انہوں نے ٹوئٹ کیا، ’’بچے محفوظ تو ملک کا مستقبل محفوظ۔ نئے سال کے موقع پر آج سے 15 سے 18 سال تک کے بچوں کی کورونا ٹیکہ کاری کے لئے کووِن پورٹل پر رجسٹریشن شروع کئے جا رہے ہیں۔ میری اہل خانہ سے گزارش ہے کہ اہل بچوں کہ ٹیکہ کاری کے لئے ان کا رجسٹریشن کریں۔‘‘