’ہندوستانی شہریوں کو ایران کے غیر ضروری سفر سے گریز کرنا چاہئے‘، بگڑتی صورتحال کے پیش نظر ہندوستانی سفارتخانہ کا انتباہ

نئی دہلی: ایران میں ہندوستانی سفارتخانہ نے ہندوستانی شہریوں کو خطے میں بگڑتی ہوئی سکیورٹی کی صورتحال کے پیش نظر ایران کے غیر ضروری سفر سے گریز کرنے کا مشورہ دیا ہے۔ سفارتخانہ نے بدھ کے روز سوشل میڈیا پر ایک پوسٹ میں کہا کہ ’’گزشتہ چند ہفتوں میں سکیورٹی کی پیش رفت کے سبب، ہندوستانی شہریوں کو مشورہ دیا جاتا ہے کہ وہ ایران کا غیر ضروری سفر کرنے سے پہلے موجودہ صورتحال کو احتیاط سے ملحوظ رکھیں۔‘‘ سفارتخانہ نے کہا ہے کہ ہندوستانی شہری خطے کی تازہ پیش رفت پر نظر رکھیں اور ہندوستانی حکام کی طرف سے جاری کردہ ایڈوائزری پر عمل کریں۔

ایران میں رہنے والے اور وطن واپسی کے خواہشمند ہندوستانی شہریوں کے لیے سفارتخانہ نے کہا ہے کہ ان کو ایسا کرنے کا اختیار دستیاب ہے۔ سفارت خانہ نے کہا، ’’ہندوستانی شہری جو پہلے ہی ایران میں مقیم ہیں اور اپنے ملک واپس لوٹنا چاہتے ہیں، وہ اب دستیاب کمرشیل فلائٹ اور فیری سروسز (کشتی سروسز) سے فائدہ اٹھا سکتے ہیں۔" ہندوستانی سفارت خانہ نے یہ ایڈوائزری اسرائیل کے ایران پر حملوں کے بعد جاری کی ہے۔ ایران کے فوجی اور جوہری اڈوں کے ساتھ ساتھ کئی شہری علاقوں پر حملوں کی وجہ سے خطے میں کشیدگی بڑھ گئی ہے۔

قابل ذکر ہے کہ حالیہ ہفتوں میں ایران اور اسرائیل کے درمیان ہونے والی جنگ اور امریکی حملہ کے بعد مشرق وسطیٰ میں کشیدگی اپنے عروج پر پہنچ چکی ہے۔ اس کا براہ راست اثر خطہ کے استحکام پر پڑ رہا ہے، جس کی وجہ سے ہندوستان سمیت کئی ممالک کی مشکلات میں اضافہ ہو گیا ہے۔ ہندوستانی حکومت پہلے سے ہی ایران کی اس صورتحال کے متعلق  الرٹ ہے۔ وزارت خارجہ مسلسل صورتحال کی نگرانی کر رہی ہے اور وقتاً فوقتاً شہریوں کو خطرات سے آگاہ کر رہی ہے، تاکہ وہاں موجود ہندوستانی محفوظ رہیں۔