’ہمارے سامانوں پر ہندوستان ٹیکس نہیں لگائے گا، خط بھیجوں گا اور انڈونیشیا جیسا معاہدہ ہو جائے گا‘، ٹرمپ کا دعویٰ

امریکی صدر ڈونالڈ ٹرمپ کی نئی ٹیرف پالیسی نے پوری دنیا میں ہلچل مچا کر رکھ دی ہے۔ اب ٹرمپ نے ایک بڑا دعویٰ یہ کیا ہے کہ امریکی مصنوعات کو جلد ہی ہندوستان کے بازار میں رسائی ملنے والی ہے۔ ان کا کہنا ہے کہ انڈونیشیا والے فارمولے پر ہندوستان کے ساتھ بھی معاہدہ طے پائے گا۔ یعنی امریکی مصنوعات پر ہندوستان میں ’زیرو ٹیرف‘ لگے گا۔

قابل ذکر ہے کہ ٹرمپ نے گزشتہ منگل کو انڈونیشیا پر 19 فیصد ٹیرف لگایا تھا۔ یکم اگست سے انڈونیشیا سے امریکہ جانے والے سامانوں پر 19 فیصد ٹیرف کی ادائیگی ہوگی، جبکہ امریکی سامانوں پر انڈونیشیا میں کوئی ٹیرف نہیں دینا ہوگا۔ انھوں نے یہ بھی کہا تھا کہ امریکہ نے انڈونیشیا کے ساتھ ایک تجارتی معاہدہ کیا ہے، جس میں 32 فیصد ٹیرف گھٹا کر 19 فیصد کر دیا گیا ہے۔ ہندوستان اور کچھ دیگر ممالک کے ساتھ بھی ایسا ہی معاہدہ ہو سکتا ہے۔

ٹرمپ نے جو تازہ بیان دیا ہے، اس میں کہا ہے کہ ’’ہم نے کئی بہترین ممالک کےس اتھ معاہدے کیے ہیں۔ ہمارا مزید ایک معاہدہ ہونے والا ہے، شاید ہندوستان کے ساتھ۔ مجھے نہیں پتہ، ہم بات چیت کر رہے ہیں۔ جب میں خط بھیجوں گا، تو وہ معاہدہ ہو جائے گا۔‘‘ ٹرمپ کا یہ بیان ایسے وقت میں آیا ہے جب امریکہ نے طے کیا ہے کہ یکم اگست سے بیشتر درآمدات پر ٹیکس یعنی ٹیرف بڑھا دیے جائیں گے۔ اس کا مطلب یہ ہے کہ جو ملک امریکہ کے ساتھ جلد معاہدہ نہیں کریں گے، ان کے سامانوں پر امریکہ زیادہ ٹیکس لگائے گا۔

واضح رہے کہ ٹرمپ نے 2 اپریل کو 100 سے زائد ممالک پر ٹیرف لگایا تھا۔ تب انھوں نے ہندوستان پر 26 فیصد ٹیرف عائد کرنے کا فیصلہ کیا تھا۔ حالانکہ بعد میں انھوں نے اسے 90 دنوں کے لیے ملتوی کر دیا۔ بتایا جا رہا ہے کہ امریکہ کے ساتھ ہو رہی ہندوستان کی ٹریڈ ڈیل میں کچھ پریشانیاں ہیں، جنھیں سلجھانے کے لیے ہندوستانی وزارت کامرس کی ایک ٹیم امریکی پہنچی ہوئی ہے۔ یہ بات چیت پیر سے شروع ہوئی تھی اور جمعرات تک چلنے کی امید ہے۔

بلومبرگ کی ایک رپورٹ کے مطابق بات چیت میں شامل ہندوستانی افسران چاہتے ہیں کہ ٹریڈ ڈیل میں ہندوستان کے لیے ٹیرف ریٹ 10 فیصد سے کم ہو۔ اس کے بدلے میں امریکہ اپنی مصنوعات کے لیے ہندوستان میں کچھ رعایتیں چاہتا ہے، لیکن ہندوستان صاف کر چکا ہے کہ وہ اپنے زرعی اور ڈیری شعبہ کو بیرون ملکی کمپنیوں کے لیے نہیں کھولے گا۔ حالانکہ ہندوستان غیر زراعتی شعبہ میں سمجھوتہ کرنے کو تیار ہے۔ ہندوستان یہ بھی پیش کش کر چکا ہے کہ اگر امریکہ ٹیکس کم کرتا ہے تو ہندوستان امریکی صنعتی سامانوں پر ٹیکس پوری طرح ختم کر دے گا۔ اس کے علاوہ ہندوستان نے امریکہ کو اپنی زرعی مصنوعات کے لیے بہتر بازار دینے کی بات کہی ہے۔