یوسف پٹھان کو گجرات ہائی کورٹ سے جھٹکا، زمین تنازعہ سے جڑے معاملے میں عرضی خارج

گجرات ہائی کورٹ سے سابق ہندوستانی کرکٹر اور موجودہ ترنمول کانگریس ایم پی یوسف پٹھان کو بڑا جھٹکا لگا ہے۔ عدالت نے ودودرا کے تندلجا میں زمین تنازعہ سے جڑی ان کی عرضی خارج کر دی ہے۔ عدالت نے کہا کہ جس پلاٹ پر یوسف پٹھان نے قبضہ کیا ہے وہ میونسپل کارپوریشن کی جائیداد ہے اور اسے خالی کرنا ہوگا۔ ایسے میں اس جائیداد پر بلڈوزر ایکشن کا خطرہ منڈلانے لگا ہے۔

یہ زمین تنازعہ کئی سال پرانا ہے۔ سابق بی جے پی کونسلر وجے پوار نے الزام لگایا تھا کہ ودودرا میونسپل کارپوریشن نے سال 2012 میں یوسف پٹھان کو ایک پلاٹ الاٹ کرنے کی تجویز منظور کی تھی اور اسے ریاستی حکومت کو بھیجا گیا تھا۔ لیکن 2014 میں گجرات حکومت نے اس تجویز کو خارج کر دی، اس کے باوجود پٹھان نے مبینہ طور پر اس پلاٹ پر قبضہ کر لیا اور وہاں چہار دیواری کے ساتھ مویشیوں کے لیے شیڈ بھی بنا دیا۔

اس کے بعد جب ودورا میونسپل کارپوریشن نے تجاوزات ہٹانے کی کارروائی شروع کی تو یوسف پٹھان نے ہائی کورٹ کا دروازہ کھٹکھٹایا۔ ان کی عرضی پر سماعت جسٹس مونا بین بھٹ کی عدالت میں ہوئی۔ عدالت نے عرضی خارج کرتے ہوئے سوال کیا کہ جب ریاستی حکومت نے زمین الاٹ کی منظوری نہیں دی تھی تو اتنے سالوں تک کارروائی کیوں نہیں ہوئی۔

اس معاملے میں ودودرا میونسپل کارپوریشن کے اسسٹنٹ کمشنرسریش توور نے بتایا کہ مغربی ودودرا کے تندلجا علاقے میں واقع ٹی پی پلاٹ کارپوریشن کی جائیداد ہے۔ پہلے اس پلاٹ کو الاٹ کرنے کا عمل شروع کیا گیا تھا لیکن ریاستی حکومت سے منظوری نہیں ملنے کے سبب یہ معاملہ رک گیا۔ اس کے باوجود یوسف پٹھان نے زمین پر اپنا قبضہ برقرار رکھا۔ اب ہائی کورٹ کا فیصلہ میونسپل کارپویشن کے حق میں آیا ہے۔ فیصلہ کے مطابق اب زمین ہمیشہ کارپوریشن کی جائیداد ہوگی۔

حالانکہ ماہرین کا ماننا ہے کہ یوسف پٹھان اب اس معاملے کو لے کر سپریم کورٹ جا سکتے ہیں۔ فی الحال ہائی کورٹ کے حکم کے بعد کارپوریشن کو تجاوزات ہٹانے کی کاررروائی آگے بڑھانے کا راستہ صاف ہو گیا ہے۔

یوسف پٹھان کی بات کی جائے تو وہ کرکٹ کے میدان میں ہی نہیں بلکہ اب سیاسی میدان میں بھی اپنی پہچان بنا چکے ہیں۔ 2024 کے لوک سبھا انتخاب میں انہوں نے ٹی ایم سی کی ٹکٹ پر لڑتے ہوئے مغربی بنگال کی برہام پور سیٹ پر کامیابی حاصل کی تھی۔