بجٹ میں کیا ہوا سستا اور کیا ہوا مہنگا؟ پرینکا گاندھی کا سوال ’روزمرہ میں استعمال ہونے والی اشیاء پر جی ایس ٹی کیوں‘

مرکزی وزیر خزانہ نرملا سیتارمن نے ہفتہ (یکم فروری) کو عام بجٹ پیش کیا۔ بجٹ میں انہوں نے ایک طرف جہاں کسان کریڈٹ کارڈ کی لِمٹ 3 لاکھ روپے سے بڑھا کر 5 لاکھ روپے تک کر دی ہے، وہیں صحت کے شعبہ میں بہتری لانے کے لیے کینسر سمیت دیگر سنگین امراض کی 36 دوائیں بھی سستی کر دی ہیں۔ ساتھ ہی کے پی ایم جی نے تمام ضلعی اسپتالوں میں کینسر سنٹر قائم کرنے کے منصوبے کی حمایت بھی کی ہے۔ یہ منصوبہ کینسر مریضوں کو اچھی صحت کی خدمات فراہم کرنے کی جانب ایک بہترین قدم ہے۔

مرکزی حکومت نے بجٹ میں جن اشیاء کے سستے ہونے کا اعلان کیا ہے ان میں کئی طرح کی معدنیات، بُنکروں کے تیار کردہ کپڑے، چمڑے سے تیار کردہ اشیاء، موبائل فون، لیتھیم بیٹری، ایل ایڈ ی۔ ایل سی ڈی ٹی وی، الیکٹرانک گاڑیاں، میڈ ان انڈیا کپڑے (ہندوستان میں تیار کردہ کپڑے)، طبی سامان، کینسر کی دوائیں، فِش پیسٹ اور چمڑے سے تیار کردہ اشیاء۔ ساتھ ہی اگر بات کی جائے ان اشیاء کی جو مہنگے ہوئے ہیں ان میں امپورٹڈ موٹر سائیکل، انٹریکٹو فلیٹ، پینل ڈسپلے اور پریمیم ٹی وی۔ وہیں سونا چاندی کے امپورٹ ڈیوٹی پر کوئی فیصلہ نہیں لیا گیا ہے اس وجہ سے ان دونوں کی قیمتوں پر کوئی اثر نہیں ہوگا۔

مرکزی حکومت کی جانب سے پیش کردہ بجٹ پر کانگریس لیڈر پرینکا گاندھی نے اپنا رد عمل ظاہر کرتے ہوئے کہا کہ مودی حکومت روزمرہ میں استعمال ہونے والی اشیاء پر اب بھی جی ایس ٹی لے رہی ہے۔ پرینکا گاندھی نے دہلی اسمبلی انتخاب کے پیش نظر ایک عوامی جلسے سے خطاب کرتے ہوئے کہا کہ ’’مودی حکومت آپ سے ضروری اشیاء پر جی ایس ٹی لے رہی ہے: ٹوتھ پیسٹ پر جی ایس ٹی، برش پر جی ایس ٹی، مکھن پر جی ایس ٹی، کپڑوں پر جی ایس ٹی، پینسل پر جی ایس ٹی اور کتابوں پر جی ایس ٹی۔‘‘ علاوہ ازیں انہوں نے کہا کہ ’’وہیں پٹرول-ڈیزل کی قیمتوں میں اضافہ کر دیا جاتا ہے۔ عوام ہر طرف سے ٹیکس سے گِھری ہوئی ہے اور اس کے عوض میں اسے صرف شیش محل، راج محل اور اڈانی-امبانی دکھائے جاتے ہیں۔‘‘