مغربی بنگال: ایس آئی آر کے دباؤ میں بزرگ نے کر لی تھی خودکشی، الیکشن کمیشن کے خلاف ایف آئی آر درج

مغربی بنگال کے پرولیا ضلع میں الیکشن کمیشن کے خلاف ایک ایف آئی آر درج کی گئی ہے۔ اس ایف آئی آر میں 82 سالہ ایک بزرگ کی موت کا ذکر ہے، جس نے ریاست میں چل رہی ووٹر لسٹ کی خصوصی گہری نظرثانی (ایس آئی آر) کے دباؤ میں مبینہ طور پر اپنی جان لے لی۔

ایک سینئر افسر نے بدھ کے روز بتایا کہ ہلاک بزرگ کے بیٹے کے ذریعہ پارا پولیس تھانہ میں درج کرائی گئی شکایت کی بنیاد پر حادثہ کے 23 دن بعد معاملہ درج کیا گیا تھا۔ افسر نے کہا کہ ’’اس معاملہ میں الیکشن کمیشن کے افسران کے خلاف خودکشی کے لیے اُکسانے اور مجرمانہ سازش کے الزامات عائد کیے گئے ہیں۔ ایف آئی آر میں کسی بھی افسر کا نام نہیں ہے۔ افسر نے یہ بھی بتایا کہ پارا بلاک کے چوٹالہ گاؤں کے ایک قبائلی بزرگ دُرجن ماجھی نے بلاک دفتر میں ایس آئی آر سماعت کے لیے پیش ہونے سے کچھ گھنٹے قبل مبینہ طور پر 29 دسمبر کو خودکشی کر لی۔ ماجھی کے اہل خانہ نے الزام عائد کیا ہے کہ وہ ووٹر لسٹ کی جاری خصوصی گہری نظرثانی کو لے کر فکر مند تھے، اور اسی وجہ سے خودکشی کر لی۔

اس درمیان ایک دیگر واقعہ میں پرولیا ضلع کے مان بازار میں 32 سالہ ایک قبائلی شخص نے بھی مبینہ طور پر خودکشی کر لی۔ اس کے گھر والوں نے بھی خودکشی کے پیچھے کی وجہ ایس آئی آر کو ہی بتائی ہے۔ گھر والوں نے دعویٰ کیا ہے کہ اس نے خودکشی جیسا قدم تب اٹھایا، جب اسے ایس آئی آر معاملہ میں سماعت کا نوٹس ملا۔ اس واقعہ کے بعد ریاست میں برسراقتدار ترنمول کانگریس نے الیکشن کمیشن پر ایس آئی آر عمل کے ذریعہ عوام میں خوف پیدا کرنے کا سنگین الزام عائد کیا ہے۔ بی جے پی اور الیکشن کمیشن نے ابھی تک اس الزام پر کوئی رد عمل ظاہر نہیں کیا ہے۔