’گرین لینڈ حاصل کر کے رہیں گے‘، امریکی صدر ٹرمپ نے ورلڈ اکونومک فورم میں ڈنمارک کی لگائی کلاس

امریکی صدر ڈونالڈ ٹرمپ نے گرین لینڈ کو کسی بھی حال میں حاصل کرنے کا اپنا عزم آج ’ورلڈ اکونومک فورم‘ (ڈبلیو ای ایف) میں واضح کر دیا۔ انھوں نے اپنے خطاب میں کہا کہ امریکہ کو کسی بھی حالت میں گرین لینڈ چاہیے۔ ٹرمپ نے داووس میں گرین لینڈ کو برف کا خوبصورت ٹکڑا بتاتے ہوئے کہا کہ ’’دنیا کی حفاظت کے لیے امریکہ کو گرین لینڈ چاہیے۔ امریکہ کو چھوڑ کر کوئی بھی ملک یا ممالک کا گروپ گرین لینڈ کو محفوظ بنانے کی حالت میں نہیں ہے۔‘‘

امریکی صدر نے امریکہ کی سابقہ قیادت کا ذکر کرتے ہوئے کہا کہ ہم بے وقوف تھے جو ہم نے جرمنی سے گرین لینڈ کی حفاظت کرنے کے بعد اسے ڈنمارک کو دے دیا۔ انھوں نے ڈنمارک کی نہ صرف کلاس لگائی، بلکہ ’احسان فراموش‘ قرار دیتے ہوئے کہا کہ ’’ڈنمارک صرف 6 گھنٹے کی لڑائی کے بعد جرمنی کے سامنے ہار گیا تھا، اور وہ نہ تو خود کی اور نہ ہی گرین لینڈ کی حفاظت کر پایا۔ اس لیے امریکہ مجبور ہوا، اور ہم نے ایسا کیا۔‘‘ وہ یہ بھی کہتے ہیں کہ ’’ہر ناٹو معاون کی یہ ذمہ داری ہے کہ وہ اپنے علاقہ کی حفاظت کرے۔ ہم ایک بڑی طاقت ہیں۔ جتنی لوگ سمجھتے ہیں، اس سے کہیں زیادہ۔ آپ نے ہماری طاقت کو کچھ ہی دن قبل وینزویلا میں دیکھ لیا۔‘‘

ڈونالڈ ٹرمپ نے سوئٹزرلینڈ کے داووس میں عالمی لیڈران سے بات کرتے ہوئے کہا کہ گرین لینڈ سے متعلق اپنے پلان میں وہ ان لوگوں کو نہیں بھولیں گے جو ’نہ‘ کہیں گے۔ وہ کہتے ہیں کہ ’’آپ ’ہاں‘ کہہ سکتے ہیں تو میں خوش ہو جاؤں گا، یا آپ ’نہ‘ کہہ سکتے ہیں، اور ہم یاد رکھیں گے۔‘‘ ٹرمپ واضح لفظوں میں کہتے ہیں کہ ’’یہ صرف امریکہ ہی ہے جو زمین کے اس عظیم ٹکڑے (گرین لینڈ)، برف کے اس خوبصورت ٹکڑے کی حفاظت کر سکتا ہے، اسے فروغ دے سکتا ہے اور اس میں بہتری لا سکتا ہے۔ اسے ایسا بنا سکتا ہے کہ یہ یوروپ کے لیے اچھا ہو، یوروپ کے لیے محفوظ ہو اور ہمارے لیے بھی اچھا ہو۔‘‘ انھوں نے یہ بھی دلیل دی کہ گرین لینڈ پر امریکہ کا کنٹرول ناٹو اتحاد کو مضبوطی فراہم کرے گا۔

گرین لینڈ کو حاصل کرنے کے لیے طاقت کا استعمال نہ کیے جانے کا ارادہ بھی ٹرمپ نے اپنے بیان میں ظاہر کیا۔ انھوں نے کہا کہ ’’جب تک میں بہت زیادہ طاقت اور زور کا استعمال کرنے کا فیصلہ نہیں کرتا، تب تک ہمیں شاید کچھ نہیں ملے گا۔ لیکن میں ایسا نہیں کروں گا، ٹھیک ہے!‘‘ وہ آگے کہتے ہیں کہ ’’یہ شاید میرا سب سے بڑا بیان ہے، کیونکہ لوگوں کو لگ رہا تھا کہ میں طاقت کا استعمال کروں گا۔ مجھے طاقت کا استعمال کرنے کی ضرورت نہیں ہے۔ میں طاقت کا استعمال نہیں کرنا چاہتا۔ میں طاقت کا استعمال نہیں کروں گا۔‘‘