نئے نائب صدر کے انتخاب کا عمل شروع، انتخاب 9 ستمبر کو، 394 ووٹ درکار ہوں گے

نئی دہلی: ہندوستان کے اگلے نائب صدر کے انتخاب کا عمل باقاعدہ طور پر شروع ہو چکا ہے۔ انتخابی کمیشن نے 9 ستمبر کو ہونے والے انتخاب کے لیے بدھ کو نوٹیفکیشن جاری کر دی، جس کے ساتھ ہی نامزدگی کا عمل شروع ہو گیا ہے۔ نوٹیفکیشن کے مطابق، امیدوار 21 اگست تک اپنی نامزدگی داخل کر سکتے ہیں۔ جمع کرائے گئے دستاویزات کی جانچ 22 اگست کو کی جائے گی، جب کہ نام واپس لینے کی آخری تاریخ 25 اگست مقرر کی گئی ہے۔

یہ انتخاب اس وقت ناگزیر ہو گیا جب موجودہ نائب صدر جگدیپ دھنکھڑ نے اچانک صحت کی وجوہات کا حوالہ دیتے ہوئے 21 جولائی کو استعفیٰ دے دیا۔ ان کی مدت کار اگست 2027 میں ختم ہونی تھی، تاہم اب ان کے استعفے کے بعد یہ عہدہ خالی ہو گیا ہے۔

آئینی دفعات کے مطابق، اگر نائب صدر کا عہدہ وسط مدتی خالی ہو جائے تو ہونے والے انتخاب میں کامیاب امیدوار کو پانچ سال کی مکمل مدت ملتی ہے۔

نائب صدر کے عہدے کے لیے امیدوار کو کچھ بنیادی شرائط پر پورا اترنا ضروری ہے۔ امیدوار کا ہندوستانی شہری ہونا، کم از کم 35 سال کی عمر مکمل کر چکا ہونا اور راجیہ سبھا کا رکن منتخب ہونے کی اہلیت رکھنا لازمی ہے۔ کوئی بھی شخص جو مرکزی یا ریاستی حکومت یا کسی مقامی اتھارٹی کے تحت کسی فائدے کے عہدے پر فائز ہو، وہ نائب صدر کے لیے اہل نہیں ہوتا۔

نائب صدر کا انتخاب پارلیمنٹ کے دونوں ایوانوں، یعنی لوک سبھا اور راجیہ سبھا کے ارکان کے ذریعے کیا جاتا ہے۔ راجیہ سبھا کے نامزد ارکان بھی اس عمل میں ووٹ ڈالنے کے اہل ہوتے ہیں۔

فی الحال 543 رکنی لوک سبھا میں مغربی بنگال کی بشیر ہاٹ سیٹ خالی ہے، جب کہ 245 رکنی راجیہ سبھا میں پانچ نشستیں خالی ہیں، جن میں سے چار جموں و کشمیر اور ایک پنجاب سے ہیں۔ پنجاب کی نشست عام آدمی پارٹی کے رکن سنجیو اروڑا کے استعفے کے بعد خالی ہوئی، جنہیں ریاستی اسمبلی میں منتخب کیا گیا تھا۔

ان خالی نشستوں کے باوجود، دونوں ایوانوں کی موثر رکنیت 786 ہے۔ ایسے میں امیدوار کو جیتنے کے لیے کم از کم 394 ووٹ حاصل کرنا ہوں گے، بشرطیکہ تمام اہل ارکان ووٹ ڈالیں۔

آئین کے آرٹیکل 66 (1) کے تحت نائب صدر کا انتخاب متناسب نمائندگی کے نظام کے تحت، واحد قابل منتقلی ووٹ (سنگل ٹرانسفر ایبل ووٹ) کے ذریعے ہوتا ہے۔ اس عمل میں ارکان کو امیدواروں کے سامنے اپنی ترجیحات درج کرنی ہوتی ہیں۔ یہ پورا عمل خفیہ رائے شماری کے ذریعے انجام پاتا ہے۔

واضح رہے کہ نائب صدر ملک کا دوسرا سب سے اعلیٰ آئینی عہدہ ہوتا ہے۔ اس کی مدت پانچ سال پر محیط ہوتی ہے لیکن اگر اس دوران کوئی نیا نائب صدر منتخب نہ ہو تو موجودہ عہدیدار تب تک اس عہدے پر فائز رہ سکتا ہے جب تک کہ نیا نائب صدر اپنا عہدہ سنبھال نہ لے۔