یوپی: تین مسلمانوں کی پٹائی، امام کے قتل کی کوشش

اتر پردیش کے باغپت ضلع میں چلتی ٹرین میں تین مسلمانوں کی بے رحمی سے پٹائی کا معاملہ پیش آیا ہے جن میں ایک مسجد کے امام بھی شامل ہیں۔ پٹائی کے بعد انھیں شر پسند عناصر نے ٹرین سے باہر پھینک دیا جس کے سبب انھیں کافی چوٹیں پہنچی ہیں۔ مقامی لوگوں کو جب اس پورے معاملے کے بارے میں پتہ چلا تو اسٹیشن پر پہنچ کر کافی ہنگامہ بھی کیا اور فوری طور پر شرپسندوں کے خلاف کارروائی کا مطالبہ کیا۔ زخمی حالت میں اقلیتی طبقہ سے تعلق رکھنے والے تینوں افراد گلزار خان (30 سال)، اسرار (25 سال) اور ابو بکر (21 سال) کو قریب کے اسپتال میں علاج کے لیے داخل کرایا گیا ہے جہاں وہ خطرے سے باہر ہیں۔

ذرائع کے مطابق امہیڑا کے رہنے والے تینوں افراد میں سے دو مدرسے میں معلمی کی ذمہ داری انجام دیتے ہیں۔ زخمی گلزار خان کا اس سلسلے میں کہنا ہے کہ وہ دہلی کے مرکز مسجد گئے تھے اور جب واپس باغپت لوٹ رہے تھے تو ٹرین میں تقریباً 7 نوجوانوں سے معمولی کہا سنی ہو گئی اور پھر معاملہ ختم ہو گیا۔ ان کا کہنا ہے کہ ماحول بہتر ہونے کے بعد ٹرین میں اوپر کی سیٹ پر بیٹھے نوجوانوں نے اچانک گالیاں دینی شروع کر دیں اور ٹرین کا دروازہ بند کر کے مار پیٹ کرنے لگے۔

گلزار خان نے مزید بتایا کہ ’’مخالفت کرنے پر تقریباً 7 حملہ آوروں نے لوہے کی رَاڈ سے پٹائی شروع کر دی اور گلا دبا کر انھیں مارنے کی کوشش بھی کی گئی۔ بعد میں امہیڑا اسٹیشن کے باہر پھینک کر فرار ہو گئے۔‘‘

زخمی حالت میں جب تینوں نے قریب کے گاؤں سے لوگوں کو مدد کے لیے بلایا اور علاقے میں علماء کی پٹائی کی خبر پھیلی تو سبھی باغپت کوتوالی کے سامنے جمع ہو گئے اور شر پسندوں کی گرفتاری کے لیے ہنگامہ کرنے لگے۔ پہلے تو پولس نے معاملے کو رفع دفع کرنے کی کوشش کی لیکن لوگوں کے دباؤ کے بعد 7 نا معلوم ملزمین کے خلاف معاملہ درج کر لیا۔ زخمی اسرار نے اس سلسلے میں بتایا کہ وہ حملہ آوروں کے نام تو نہیں جانتے لیکن سامنے آنے پر پہچان سکتے ہیں۔ انھوں نے بتایا کہ ’’ہم نے سر کو ڈھکا ہوا تھا، اس بات سے انھیں پریشانی تھی اور ہم سے لگاتار پوچھ رہے تھے کہ ہم نے سر کیوں ڈھکا ہوا ہے۔‘‘

باغپت پولس سپرنٹنڈنٹ جے پرکاش سنگھ سے جب اس معاملے میں جانکاری حاصل کرنے کی کوشش کی گئی تو انھوں نے بتایا کہ 22 نومبر کی رات دہلی سے تین مسلم گلزار، اسرار اور ابو بکر پسنجر ٹرین سے باغپت اپنے گاؤں لوٹ رہے تھے۔ پسنجر ٹرین میں ان کا کسی بات پر کچھ لوگوں سے تنازعہ ہو گیا جس پر نوجوانوں نے ان کی پٹائی کر دی۔ رات تقریباً 12.45 بجے باغپت تھانہ پولس میں انھوں نے واقعہ سے متعلق جانکاری دی۔ جے پرکاش نے مزید بتایا کہ ’’معاملہ ریاستی ریلوے پولس سے تعلق رکھتا ہے پھر بھی پولس نے متاثرہ فریق کی شکایت پر 7 نامعلوم حملہ آوروں کے خلاف مقدمہ درج کر لیا ہے اور کیس کو باغپت ریلوے پولس کو منتقل کیا جا رہا ہے۔‘‘