وزیر اعظم مودی کے دورے سے قبل منی پور میں کشیدگی، جھڑپیں اور سکیورٹی آپریشن تیز

امپھال: وزیر اعظم نریندر مودی کے متوقع دورے سے قبل منی پور میں کشیدگی بڑھ گئی ہے۔ ہفتے کے روز ضلع چوراچاند پور میں نامعلوم شرپسندوں کی جانب سے سرکاری تیاریاں اور سجاوٹ ہٹائے جانے کے بعد جھڑپیں شروع ہو گئیں۔ پولیس اور سکیورٹی فورسز نے اگرچہ کوئی باضابطہ بیان جاری نہیں کیا ہے، تاہم ذرائع کے مطابق یہ توڑ پھوڑ تقریباً ڈیڑھ گھنٹے تک جاری رہی جس کے بعد علاقے میں سخت حفاظتی انتظامات نافذ کر دیے گئے۔

منی پور حکومت نے پہلے ہی ضلع چوراچاند پور میں ڈرون اور اسلحہ کے استعمال پر پابندی عائد کر رکھی تھی۔ حفاظتی اقدام کے طور پر پولیس اور سکیورٹی فورسز نے کانگ پوکپی علاقے میں کوکی انتہا پسندوں کے ایک قائم شدہ بنکر کو بھی تباہ کر دیا۔ یہ سب اقدامات وزیر اعظم مودی کے ریاست کے ہائی پروفائل دورے کی تیاریوں کے پیشِ نظر کیے جا رہے ہیں۔ مئی 2023 میں نسلی تشدد کے بعد یہ دورہ اہم سمجھا جا رہا ہے۔

ذرائع کے مطابق وزیر اعظم مودی چوراچاند پور میں 7300 کروڑ روپے کے ترقیاتی منصوبوں کا اعلان کریں گے جبکہ امپھال کے کانگلا میں 1200 کروڑ روپے کے بنیادی ڈھانچے کے پروجیکٹس کا افتتاح کریں گے۔ اس موقع پر مختلف علاقوں میں بینرز بھی لگائے گئے ہیں۔

دریں اثنا، سکیورٹی فورسز نے منی پور کے سرحدی اور حساس علاقوں میں تلاشی مہم تیز کر دی ہے۔ جیریبام ضلع کے سونا پور اور جیرول پوکپی گاؤں کے قریب پولیس نے کارروائی کرتے ہوئے بھاری مقدار میں اسلحہ اور دھماکہ خیز مواد برآمد کیا۔ برآمدگی میں ایک ایس بی بی ایل بندوق، تین دیسی ساختہ موزل لوڈنگ بندوقیں، ایک .22 پستول، ایک دیسی ساختہ ڈبل بیرل بندوق، آٹھ 12 بور کارتوس، 56 بارنی بیگ، تین بوتلیں، 240 کانچ کے ٹکڑے اور گولہ بارود بھرنے کے لیے استعمال ہونے والی ایک لوہے کی راڈ شامل ہے۔

اسی دوران تھوبل ضلع میں پولیس نے ایک علیحدہ کارروائی کے دوران دو افراد کو گرفتار کیا، جن کے قبضے سے 35 گرام ہیروئن اور ایک موبائل فون ضبط کیا گیا۔ امپھال میں بھی ایک مشتبہ انتہا پسند کو حراست میں لیا گیا ہے۔

سکیورٹی اداروں نے گاڑیوں کی تلاشی کا سلسلہ شروع کر دیا ہے اور اہم مقامات پر اضافی نفری تعینات کی گئی ہے۔ حکام کا کہنا ہے کہ وزیر اعظم کے دورے کے دوران کسی بھی ناخوشگوار واقعے سے بچنے کے لیے ریاست میں سکیورٹی کے غیر معمولی اقدامات کیے جا رہے ہیں۔

دوسری جانب انتہا پسندوں کی ایک تنظیم نے وزیر اعظم مودی کے دورے کے موقع پر ریاست بھر میں مکمل بند کا اعلان کیا ہے۔ اس اعلان نے مقامی آبادی میں مزید بے چینی پیدا کر دی ہے۔

Tensions Erupt Ahead of PM Modi’s Manipur Visit: Clashes, Crackdown, and Security Tightened