کوٹہ میں بلڈنگ گری: ملبے تلے دب کر ایک کی موت، سات شدید زخمی

راجستھان کے کوٹا میں کل ہفتہ 7 فروری کو ایک بڑا حادثہ پیش آیا۔ کوٹہ کے جواہر نگر تھانہ علاقے میں اوپرا اسپتال روڈ پر واقع دہلی اسپائس مرادآبادی نامی نان ویجیٹیرین ریسٹورنٹ کی عمارت اچانک گر گئی۔ حادثے سے علاقے میں خوف وہراس پھیل گیا۔ ملبے تلے دب کر ایک شخص کی موت ہو گئی جبکہ سات دیگر کو تشویشناک حالت میں اسپتال داخل کرا دیا گیا۔ کوٹہ حادثہ میں مرنے والوں میں بنگال کا ایک 20 سالہ شخص بھی شامل ہے۔

ابتدائی معلومات کے مطابق 10 سے 15 افراد کے ملبے تلے دبے ہونے کا خدشہ ہے۔ واقعہ کی اطلاع ملتے ہی پولیس، انتظامی اہلکار اور امدادی ٹیمیں جائے وقوعہ پر پہنچ گئیں۔ ضلع کلکٹر نے بتایا کہ ملبے سے پانچ لوگوں کو نکال کر اسپتال بھیجا گیا ہے۔ امدادی کارروائیوں میں تیزی آنے سے یہ تعداد بڑھ کر 10 زخمی ہو گئی، جنہیں علاج کے لیے مختلف اسپتالوں میں داخل کرایا گیا ہے۔

نیوز پورٹل’ اے بی پی ‘ پر شائع خبر کے مطابق 10 افراد کو بچا کر اسپتال بھیجا گیا ہے۔ کئی دوسرے بھی پھنس سکتے ہیں۔ ملبہ ہٹانے کے لیے دو جے سی بی مشینیں کام کر رہی ہیں۔ احتیاط کے طور پر علاقے میں بجلی کی سپلائی منقطع کر دی گئی ہے۔ تمام زخمیوں کو علاج کے لیے کوٹا میڈیکل کالج میں داخل کرایا جا رہا ہے۔