تلنگانہ: سرنگ حادثہ میں پھنسے لوگوں کو بچانے کی مہم جاری، گھٹنوں تک کیچڑ، بچاؤ ٹیم کو مشکلات کا سامنا

تلنگانہ میں سری سائیلام ڈیم سرنگ حادثہ میں پھنسے لوگوں کو بچانے کے لیے راحت و بچاؤ مہم مسلسل کئی گھنٹوں سے جاری ہے۔ حالانکہ اس دوران بچاؤ ٹیم کو اس وقت بڑا جھٹکا لگا جب سرنگ پوری طرح منہدم ہو گئی۔ گھٹنوں تک کیچڑ بھرا ہوا ہے۔ اس وجہ سے سرنگ کے اندر جانا بے حد مشکل ہوتا جا رہا ہے۔ لیکن پھر بھی بچاؤ ٹیم پھنسے ہوئے لوگوں کو نکالنے کی پوری کوشش کر رہی ہے اور دیگر متبادل کی تلاش میں ہے۔

ادھر ہندوستانی فوج نے اپنے انجینئر ٹاسک فورس کو بھی الرٹ موڈ میں رکھا ہے۔ سرنگ کے اندر آٹھ لوگوں کے پھنسے ہونے کا خدشہ ہے۔ راحت اور بچاؤ کام میں ایس ڈی آر ایف اور این ڈی آر ایف کی ٹیمیں لگی ہوئی ہیں۔ ایس ڈی آر ایف کے ایک افسر نے بتایا کہ سرنگ کے اندر جانے کا کوئی متبادل نہیں ہے۔ سرنگ پوری طرح سے منہدم ہو چکی ہے۔ گھٹنوں تک کیچڑ ہے اور ہمیں اب دیگر متبادل پر کام کرنا ہوگا۔

واضح ہو کہ جمعہ کی صبح تلنگانہ کے نگر کُرنول ضلع میں شری شیلم لیفٹ بینک کینال (ایس ایل بی سی) سرنگ کا زیر تعمیر تین میٹر حصہ منہدم ہو گیا تھا۔ بتایا جاتا ہے کہ لمبے وقت سے اس سرنگ پر کام لٹکا ہوا تھا۔ کافی وقت بعد جب کام دوبارہ شروع کیا گیا تو چار دن بعد ہی یہ دردناک حادثہ پیش آ گیا۔ وزیر اعظم نریندر مودی نے تلنگانہ کے وزیر اعلیٰ ریونت رڈی سے اس واقعہ پر بات کی۔ وزیر اعظم نے وزیر اعلیٰ کو راحت اور بچاؤ کام میں مرکز کی طرف سے پورے تعاون کی یقین دہانی کرائی۔

فوج نے کہا کہ این ڈی آر ایف اور ایس ڈی آر ایف کی ٹمیوں کو جائے حادثہ پر تعینات کیا گیا ہے۔ سکندر آباد میں تعینات ہندوستانی فوج کی ایک انجینئر رِجمنٹ کو اسٹینڈ بائے پر رکھا گیا ہے۔ ٹیم آرمی میڈیکل کور فیلڈ ایمبولینس سے ایک طبی ٹکڑی، ایک ایمبولنس، تین اعلیٰ صلاحیت والے پمپنگ سیٹ، بختر بند حوض اور دیگر معاون آلات سے مزین ہے۔ تلنگانہ کے چیف سکریٹری نے فوج سے گزارش کیی تھی۔ اس کے بعد فوج نے اپنے انجینئر ٹاسک فورس (ای ٹی ایف) کو فوراً فعال کیا۔