کالجیم میٹنگ میں جسٹس جوسف کا نام مرکز کو دوبارہ بھیجے جانے کا فیصلہ

سپریم کورٹ کالجیم نے اتراکھنڈ کے چیف جسٹس کے ایم جوسف کو سپریم کورٹ میں پرموشن دینے کے لیے ان کا نام دوبارہ مرکزی حکومت کو بھیجنے کا فیصلہ لیا ہے۔ جمعہ یعنی 11 مئی کو کالجیم کی میٹنگ میں جسٹس جوسف سے متعلق تبادلہ خیال ہوا۔ بتایا جا رہا ہے کہ اس میٹنگ میں دوسرے ناموں پر بھی غور کیا گیا۔ کالجیم کی آئندہ میٹنگ 16 مئی کو ہوگی۔

اس سے قبل 26 اپریل کو مرکزی حکومت نے اتراکھنڈ کے چیف جسٹس کے ایم جوسف کو سپریم کورٹ میں پرموشن دینے کی کالجیم کی سفارش کو منظوری نہیں دی تھی۔ اس کے پیچھے مرکزی حکومت نے یہ دلیل دی تھی کہ کالجیم کی تجویز ٹاپ کورٹ کے پیرامیٹرس کے مطابق نہیں ہے۔ حکومت نے یہ بھی کہا تھا کہ جسٹس کے ایم جوسف کا تعلق کیرالہ سے ہے اور سپریم کورٹ میں اس ریاست سے مناسب نمائندگی ہے۔

سپریم کورٹ کے جسٹس جے چیلامیشور نے گزشتہ بدھ یعنی 9 مئی کو چیف جسٹس دیپک مشرا کو خط لکھ کر کالجیم کی میٹنگ بلانے کے لیے کہا تھا تاکہ جسٹس کے ایم جوسف کو سپریم کورٹ میں پرموشن دینے کے لیے مرکزی حکومت سے دوبارہ سفارش کی جا سکے۔