این ایس یو آئی کے ’منریگا بچاؤ سنگرام مارچ‘ پر پولیس کی بربریت، وارانسی میں قومی صدر ورون چودھری گرفتار

وارانسی: نیشنل اسٹوڈنٹس یونین آف انڈیا (این ایس یو آئی) کا ’منریگا بچاؤ سنگرام مارچ‘ اتوار (11 جنوری) کو وارانسی میں بنارس ہندو یونیورسٹی (بی ایچ یو) کے لنکا گیٹ سے وزیر اعظم دفتر تک مقرر تھا۔ اس مارچ کی قیادت این ایس یو آئی کے قومی صدر ورون چودھری کر رہے تھے۔ اترپردیش کے مختلف اضلاع اور یونیورسیٹیوں سے آئے طلبہ نے اس میں حصہ لیا اور مودی حکومت کے ذریعہ منریگا کو کمزور اور ختم کرنے کی منظم کوششوں کے خلاف متحد ہو کر اپنا احتجاج درج کرایا۔

گزشتہ کل سے ہی وارانسی اور شمالی اترپردیش میں پولیس کے ذریعہ ہاسٹلوں اور طلبہ کی رہائش گاہوں پر چھاپے ماری کی جا رہی تھی۔ کئی طلبہ کو گھر میں نظر بند کر دیا گیا، جبکہ دیگر طلبہ کو جبراً اٹھا کر تھانے میں لے جایا گیا، جس سے خوف اور جبر کا ماحول بنایا گیا۔ مودی-یوگی حکومت اور پولیس مشینری نے مشترکہ طور پر ریاست کو غیر اعلانیہ ایمرجنسی میں بدل دیا ہے۔ اس کے باوجود این ایس یو آئی کے قومی صدر سمیت سینکڑوں کارکنان اس مارچ میں شامل ہوئے۔

این ایس یو آئی میڈیا ڈیپارٹمنٹ نے پریس ریلیز میں یہ بھی کہا کہ اس مکمل طور سے پرامن اور جمہوری مارچ کے دوران پولیس نے واضح سیاسی ہدایات کے تحت این ایس یو آئی کے طلبہ اور کارکنان پر بے دردی سے لاٹھی چارج کیا۔ اس کے نتیجے میں این ایس یو آئی کے قومی صدر ورون چودھری اور ریاستی سطح کے کئی عہدیدار اور تقریباً 100 این ایس یو آئی کارکنان زخمی ہوئے، گرفتار کیے گئے کارکنان وارانسی کے مختلف تھانوں میں بھیج دیے گئے۔ ورون چودھری کو گرفتار کر کے پہلے وارانسی کے لنکا تھانے میں رکھا گیا تھا۔ اس کے بعد انتظامیہ نے انہیں لنکا سے روہنیا تھانے میں منتقل کر دیا۔

این ایس یو آئی کے قومی صدر ورون چودھری نے کہا کہ ’’منریگا صرف ایک سرکاری منصوبہ نہیں ہے بلکہ یہ ہندوستان کے بہوجن سماج کے لیے لائف لائن اور بقا کا سوال ہے۔ وزیر اعظم کے اپنے لوک سبھا حلقہ وارانسی میں منریگا پر پرامن احتجاج کے جواب میں مودی حکومت نے لاٹھی چارج اور جبر کا راستہ اختیار کیا۔‘‘ ساتھ ہی انہوں نے کہ ’’یہ طلبہ، نوجوانوں اور معاشرے کے پسماندہ طبقات کی جائز آوازوں سے اقتدار کے خوف کو ظاہر کرتا ہے۔‘‘

ورو ن چودھری کا کہنا ہے کہ ’’یہ بالکل واضح ہے کہ کوئی لاٹھی، کوئی گرفتاری اور کوئی جبر دلت اور بہوجن سماج کی آواز کو دبا نہیں سکتا۔ میں اس جدوجہد میں ثابت قدم ہوں۔ تاناشاہوں کو پیغام ہے، جہاں بھی ناانصافی جڑ پکڑے گی وہاں سے ہماری مزاحمت اٹھے گی اور انقلاب لکھا جائے گا۔‘‘ این ایس یو آئی پولیس کی اس غیر آئینی بربریت کی پرزور مذمت کرتی ہے اور منریگا کی حفاظت اور روزگار کے آئینی حق کی حفاظت کے لیے ملک گیر تحریک کو مزید تیز کرنے کے اپنے عزم کا اعادہ کرتی ہے۔