جموں و کشمیر میں شدید سردی، ڈل جھیل جزوی طور پر منجمد

وادی بھرمیں کم سے کم درجہ حرارت کافی نیچے گر گیا ہے۔ بارش کے علاوہ برف باری کی وجہ سے شدید سردی کی لہر نہ صرف شہر سرینگر بلکہ وادی کے دیگر علاقوں میں بھی جاری ہے۔بیشتر آبی ذخائر بشمول سیاحوں کی تفریح کا مرکز شہرہ آفاق جھیل ڈل کے بیشتر حصے اور پانی کے نل منجمند ہو چکے ہیں۔

دریں اثنا کرگل میں موسم کی سرد ترین رات ریکارڈ کی گئی جہاں درجہ حرارت 20.6 ڈگری سلسیس تک گر گیا۔ خطۂ لداخ میں سب سے کم لیہ کا درجہ حرارت رہا جو کہ 16.6 ریکارڈ کیا ۔محکمہ موسمیات کے مطابق وادی کشمیر کا موسم اگلے 24 گھنٹوں تک خشک اور سرد بنا رہے گا۔

چلہ کلاں کیا ہیں ؟

واضح رہے ، چلہ کلاں کے لغوی معنی ’’ 40بڑے ‘‘ہے۔یعنی شدت کی سردی کے چالیس ایام۔چلہ کا فارسی میں مطلب چالیس ہے۔ایسی ٹھنڈ جو خون کو بھی جما دے۔منفی ڈگری درجہ حرارت میں پانی کے نلکے جم کر پھٹ جاتے ہیں۔ ڈل جھیل سمیت تمام جھیلیں جم جاتی ہیں۔ چلہ کلاں کا کشمیر کے رہن سہن ، ثقافت اور تہذیب سے گہرا تعلق ہے۔ یہ شدید سردی کے 40دن ہوتے ہیں اور 22دسمبر سے 31 جنوری تک جاری رہتے ہیں۔ کڑاکے کی سردی یا ٹھنڈ کا نقطہ ٔ عورج چلہ کلاں کہلاتا ہے ، پھر چلہ خورد ہے، پھر چلہ بچہ۔ یوں چلہ خورد کا مطلب کم سردی کے چالیس دن ہو سکتا ہے۔تا ہم چلہ خورد چلہ کلاں کے بعد 20دن کو کہتے ہیں۔

وادی کے لوگ اکثر چلہ کلان کا مقابلہ کرنے کیلئے گرم ملبوسات ،کانگڑیاں اور گیس بخاریوں کا انتظام کر کے رکھتے ہیں جبکہ وادی کے اکثر علاقوں میں لوگ پہلے سے ہی سوکھی سبزیوں کا ذخیرہ کر کے رکھتے ہیں ۔کشمیر وادی میں اس موسم میں لوگ کھانے پینے کی چیزوں میں بھی بدلائو کرتے ہیں جہاں اس موسم میں لوگ گرم پانی کا استعمال کرتے ہیں وہیں دالیں ، سوکھی سبزیاں ، سوکھی مچھلیاں پہلے سے ہی دکانوں سے خرید کر رکھی جاتی ہیں جبکہ کئی ایک لوگ اپنے گھروں میں سبزیوں کو سکھاتے ہیں ۔