بی ایس این ایل کے سری نگر دفتر میں کچھ ملازمین پائے گئے کورونا پازیٹو، دفتر بند

سری نگر: سری نگر کے ایکسچینج روڈ پر واقع سرکاری مواصلاتی کمپنی بھارت سنچار نگم لمیٹڈ (بی ایس این ایل) کا مرکزی دفتر میں کچھ ملازموں کا کورونا ٹیسٹ مثبت آنے کے پیش نظر پیر کے روز بند رہا۔ یہ دوسرا موقع ہے کہ جب بی ایس این ایل نے مرکزی دفتر جو یو این آئی دفتر سے صرف چند میٹر کی دوری پر ہی واقع ہے، کو ملازمین کا ٹیسٹ مثبت آنے کے پیش نظر بند رکھا گیا ہے۔

بی ایس این ایل کے پی آر او مسعود بالا نے یو این آئی اردو کو بتایا کہ کچھ ملازموں کا ٹیسٹ مثبت آنے کے بعد دفتر بند کر دیا گیا ہے۔ انہوں نے کہا کہ دفتر کم سے کم تین دنوں تک بند رہ سکتا ہے۔ موصوف نے کہا کہ جن ملازموں کے ٹیسٹ مثبت آئے ہیں وہ سب غیر علامتی تھے۔ یو این آئی کے ایک نامہ نگار نے بی ایس این ایل دفتر کا دورہ کرنے کے بعد بتایا کہ دفتر کے گیٹ پر مامور سیکورٹی اہلکار صارفین کو دفتر بند ہونے کے بارے میں مطلع کر رہے تھے۔

موصوف نے کہا کہ کافی تعداد میں صارفین جو بل جمع کرنے یا دوسرے امور کی انجام دہی کے لئے پیر کی صبح دفتر پہنچے تھے کو مایوس ہو کر ہی گھر واپس جانا پڑا۔ انھوں نے کہا کہ ایک نجی ایجنٹ دفتر سے کچھ دوری پر بیٹھا تھا اور لوگوں کو تین سو روپے میں بی ایس این ایل کے سم کارڈ دے رہا تھا۔