ممبئی کی پہچان سرگرم سماجی اور تعلیمی کارکن مقبول عالم خان کا انتقال

مسلمانوں کی سماجی اور تعلیمی بہتری کیلئے ہمیشہ سرگرم رہے اور ممبئی فسادات کی تحقیقات کرنے والے سری کرشنا کمیشن کی کارروائی کے دوران اہم رول ادا کرنے والے مقبول عالم خان کا 85سال کی عمر میں انتقال ہوگیا۔

مقبول عالم کے انتقال کی خبران کی صحافی اورمعلمہ بیٹی یاسمین عالم نے دی ہے۔ان کے پسماندگان میں تین بیٹیاں اور دو بیٹے ہیں۔

صحافی فاروق سید نے کہاکہ مرحوم بہت خاموشی سے ملت کے مسائل پر سنجیدگی سے غور وفکر کے بعد اس کا حل پیش بھی کرتے تھے،وہ بمبئی امن کے بانیوں میں سے تھے ،تعلیمی اور سماجی میدانوں میں سرگرم رہے۔ٹاٹاپرنٹنگ پریس سے سبکدوش ہوئے اور ملت کی فلاح وبہبود کے کام میں سرگرم عمل رہے۔
اتوار کی صبح مختصر علالت کے بعد دل کا دورہ پڑنے سے جے جے اسپتال میں انتقال ہوگیا، ان کی کورونا کی رپورٹ نیگیٹیو تھی۔تدفین بعد نماز مغرب بڑا قبرستان، چرنی روڑ، ممبئی میں عزیز واقارب کی موجودگی میں عمل میں آئی۔

خیال رہے کہ مقبول عالم خان شہر کی اہم سماجی تنظیموں سے وابستہ تھے اور سماجی اجلاس میں ان کی شرکت ضروری سمجھی جاتی تھی۔

سابق پروفیسر سعید خان نے کہاکہ مرحوم کے ساتھ راشٹر وادی کانگریس پارٹی میں کام کرنے کا شرف حاصل رہا ہے ۔ بڑی خوبیوں کے مالک تھے ،اﷲتعالیٰ مرحوم مقبول عالم خان کی مغفرتکرےاور ان کے درجات بلند فرمائے اور جنت الفردوس میں اعلیٰ مقام عطا فرمائے ۔ آمین