’پوری دنیا میں چل رہی ہے امریکہ کی دادگری‘، ٹرمپ کے بیان پر کانگریس کے ایم پی عمران مسعود برہم

 امریکی صدر ڈونالڈ ٹرمپ کے گرین لینڈ کے حوالے سے دیئے گئے بیان نے بین الاقوامی سیاست میں ہلچل مچا رکھی ہے۔ اس بیان پر ہندوستان میں بھی سیاسی رد عمل سامنے آ رہے ہیں۔ اس دوران کانگریس کے رکن پارلیمنٹ عمران مسعود نے ٹرمپ کی پالیسیوں اور سوچ پر سخت سوال اٹھایا ہے۔ ان کا کہنا ہے کہ امریکہ جس طرح دنیا کے مختلف حصوں میں مداخلت کر رہا ہے وہ انتہائی تشویشناک ہے۔

عمران مسعود نے کہا کہ امریکہ کی پوری دنیا کے اندر داداگری چل رہی۔ سب کو متحد ہوکرامریکہ کے خلاف کھڑا ہونا چاہیے۔ انہوں نے کہا کہ امریکہ اپنے مفادات کے لیے ہر جگہ دباؤ ڈالنے کی کوشش کر رہا ہے اور یہ رویہ عالمی توازن کے لیے اچھا نہیں ہے۔ عمران مسعود کے مطابق اب وقت آ گیا ہے کہ دنیا کی اقوام متحد ہو کر ایسے رویے کی مخالفت کریں۔

حال ہی میں گرین لینڈ کانام سامنے آنے کے بعد یورپ میں بھی ہلچل مچ گئی ہے۔ یہ علاقہ تزویراتی اور جغرافیائی لحاظ سے انتہائی اہم سمجھا جاتا ہے۔ اس حوالے سے عمران مسعود نے امریکہ کے ارادوں پر سوال اٹھاتے ہوئے کہا کہ ایسے بیانات سے بین الاقوامی تعلقات میں تناؤ بڑھ سکتا ہے۔

کانگریس کے رکن پارلیمنٹ نے ٹرمپ پر براہ راست حملہ کرتے ہوئے کہا کہ جس طرح سے امریکہ پوری دنیا کو پریشان کر رہا ہے، اب یورپ میں بھی گرین لینڈ چل گیا تو یہ ایک ایسے شخص کے ہاتھ میں اقتدار آگیا کہ جو جہاں چاہے، جس طرح چاہے، من مرضی چلاسکتا ہے۔ انہوں نے کہا کہ کسی ایک شخص کے خیالات اور فیصلوں سے پوری دنیا کو متاثر کرنا خطرناک اشارہ ہے۔

عمران مسعود کے بیان کے بعد واضح ہے کہ گرین لینڈ جیسے مسائل صرف امریکہ یا یورپ تک محدود نہیں بلکہ عالمی سیاست پر اثر انداز ہوتے ہیں۔ انہوں نے کہا کہ جمہوری ممالک کو بین الاقوامی قوانین اور توازن کے تحفظ کے لیے ایسے اقدامات کی مخالفت کے لیے متحد ہونا چاہیے۔ کانگریس کا کہنا ہے کہ وہ ہمیشہ امن، تعاون اور بین الاقوامی قوانین کے حق میں رہی ہے اور امریکہ جیسی طاقتوں کو من مانی کرنے سے روکا جانا چاہیے۔