تہوّر رانا کو لے کر دہلی میں سیکوریٹی الرٹ، ہوائی اڈے سے لے کر پٹیالہ ہاؤس کورٹ تک سخت پہرا

26/11 ممبئی حملوں کے ملزم تہوّر رانا کو امریکہ سے ہندوستان لائے جانے کی وجہ سے دہلی میں بے حد سخت حفاظتی انتظامات کیے گئے ہیں۔ ہوائی اڈے سے لے کر پٹیالہ ہاؤس کورٹ اور این آئی اے ہیڈکوارٹر کے آس پاس سب سے زیادہ سخت پہرا ہے۔ این آئی اے ہیڈکوارٹر کے پاس جواہر لال نہرو اسٹیڈیم، میٹرو اسٹیشن کے دو گیٹ کو بھی بند کر دیا گیا ہے۔

پاکستانی کینیڈیائی نسل کے تہوّر رانا (64) پر 2008 کے ممبئی دہشت گردانہ حملوں کے اہم سازش  کنندہ میں سے ایک امریکی شہری ڈیوڈ کولمین ہیڈلی عرف داؤد گیلانی کے قریبی معاون ہونے کا الزام ہے۔

دہلی واقع پٹیالہ ہاؤس کورٹ کے باہر حفاظت کے سخت انتظامات کیے گئے ہیں جہاں ممبئی حملوں کے ملزم تہور رانا کو امریکہ سے حوالگی کیے جانے کے بعد پیش کیا جانا ہے۔ ایک افسر نے بتایا کہ نیم فوجی دستوں اور دہلی پولیس کے جوانوں کو عدالت کے باہر تعینات کیا گیا ہے اور کسی بھی ناخوشگوار واقعہ سے بچنے کے لیے آنے جانے والوں کی گہری تلاشی لی جا رہی ہے۔

دہلی میں ہوائی اڈے سے لے کر تہاڑ جیل، پٹیالہ ہاؤس کورٹ اور این آئی اے ہیڈکوارٹر کے پاس ہائی الرٹ اعلان کیا گیا ہے۔ پورے روٹ پر جگہ جگہ سیکوریٹی اہلکار تعینات ہیں۔ گاڑیوں کی جانچ کی جا رہی ہے۔ سی سی ٹی وی اور ڈرون سے بھی علاقے کی نگرانی کی جا رہی ہے۔

بتایا جاتا ہے کہ تہور رانا کو تہاڑ جیل میں رکھا جائے گا۔ تہاڑ جیل کے افسروں نے کہا کہ رانا کو ہائی سیکوریٹی والے جیل وارڈ میں رکھنے کی سبھی تیاریاں کرلی گئی ہیں اور وہ عدالت کے حکم کا انتظار کر رہے ہیں۔ تہاڑ میں رانا کو جس سیل میں رکھا جائے گا وہاں بھی سیکوریٹی بڑھا دی گئی ہے۔ تہاڑ جیل کے آس پاس کافی چوکسی برتی جا رہی ہے۔