سہارنپور: بی ایس پی لیڈر اقبال کے بیٹوں و پارٹنر کے گھر سی بی آئی کا چھاپہ

سہارنپور: سی بی آئی نے منگل کو اترپردیش کے ضلع سہارنپور میں بہوجن سماج پارٹی (بی ایس پی) کے سابق ایم ایل سی و کانکنی کاروباری اقبال عرف بلا اور ان کے شراکت دار سوربھ مکند کے گھر چھاپہ ماری کی ۔

صبح تقریبا دس بجے شروع ہوئی چھاپہ مااری کی یہ کاروائی شام تک جاری رہی۔ باوثوق ذرائع کے مطابق سی بی آئی کے افسران نمرتا مارکیٹنگ پرائیویٹ لمیٹیڈ کے ڈائرکٹر سوربھ مکند کے صدر بازار ساوتھ سٹی واقع مکان پر پہنچے اور جانچ کی کاروائی شروع کی۔تھوڑی دیر کے بعد تھانہ صدر بازار پولیس بھی موقع پر پہنچ گئی۔

سوربھ مکند کے والد موہن لال سہارنپور کے کانکنی کاروباری سابق ایم ایل سی اقبال عرف بلا فرم کے شراکت دار ہیں۔ ان لوگوں پر سال 2010۔2011 میں سستے داموں میں چینی مل خریدنے کا الزام ہے۔سی بی آئی اب اس معاملے کی جانچ کرر ہی ہے۔
اترپردیش چینی مل نگم کی جانب سے مایاوتی حکومت کے میعاد کار میں سستے داموں پر فروخت کی گئی 11 چینی ملوں کے ضمن میں ایف آئی آر لکھنؤ کے گومتی نگر تھانے میں درج کرائی تھی۔ مرکز اور اترپردیش کی یوگی حکومت نے اس معاملے میں جانچ اور کاروائی کی ذمہ داری سی بی آئی سے کی تھی۔

ذرائع کے مطابق چینی مل کے خریداروں میں اقبال بلا کے دو بیٹے جاوید اور واجد کے بھی نام ہیں اور ان کے ملازم نسیم کا بھی نام ہے۔ نسیم اور بلا کے دونوں بیٹوں کے یہاں بھی سی بی آئی ٹیم جانچ کے لئے پہنچی۔

اس معاملے میں ڈپٹی انسپکٹر جنرل آف پولیس اوپیندر اگروال نے کہا کہ سی بی آئی ایک خودمختار ایجنسی ہے۔ اس لئے ان کے لئے سہارنپور پولیس اتنظامیہ کو اطلاع دینا ضروری نہیں تھا۔ ڈی آئی جی کی طرح ڈی ایم آلوک پانڈے نے بھی سہارنپور میں ہوئی آج سی بی آئی کی چھاپہ ماری کے بارے میں کچھ بھی تبصرہ کرنے سے یہ کہتے ہوئے انکار کردیا کہ اس سے ہمارا کوئی تعلق نہیں ہے۔