اسمبلی ضمنی انتخابات سے قبل بی ایس پی میں پھیر بدل، 3 نئے کوآرڈینیٹر نامزد

لکھنؤ: اترپردیش میں 13 اسمبلی سیٹوں پر ہونے والے ضمنی انتخابات کی تیاریوں میں مشغول بہوج سماج پارٹی(بی ایس پی) نے تنظیم ڈھانچے کو مضبوطی فرا ہم کرنے کے مقصد سے تین نئے کوآرڈینیٹر نامزد کئے ہیں۔

بی ایس پی سپریمو مایاوتی نے جمعرات کو پارٹی کے ریاستی دفتر میں ضمنی انتخابات کی تیاریوں کے جائزہ کے لئے ذمہ داروں اور کارکنوں کے ساتھ میٹنگ کی اور برسراقتدار بی جے پی کے سازشوں سے محتاط ہوکر پوری سنجیدگی کے ساتھ انتخابات کی تیاریاں کرنے کی نصیحت دی۔

پارٹی ذرائع نے بتایا کہ اس موقع پر پارٹی سپریمو نے ریاستی صدر منقاد علی کے علاوہ سابق ریاستی صدر آر ایس کشواہا اور بھیم راؤ امبیڈکر کو اترپردیش کا کوآرڈینیٹر مقرر کیا ہے۔ تینوں ریاست کا دورہ کر کے پارٹی کے زمینی حقائق کا اندازہ لگاتے ہوئے پارٹی کو مضبوط کرنے کی حکمت عملی ترتیب دے کر اس پر کام کریں گے۔انہوں نے بتایا کہ ریاست میں اب ایک ڈویژن میں ایک انچارج ہوگا۔ پہلے تین منڈلوں کا ایک زون انچارج ہوا کرتا تھا۔

قابل ذکر ہے کہ بی ایس پی نے گذشتہ دنوں قومی مجلس عاملہ کی میٹنگ میں تنہا انتخابی میدان میں اترنے کا اعلان کرتے ہوئے 11 امیدواروں کے ناموں کا اعلان بھی کردیا تھا۔بی ایس پی کئی سالوں بعد ضمنی انتخاب لڑنے جارہی ہے۔

بی ایس پی نے ضمنی انتخابات کے لئے گھوسی سے قیوم انصاری، مانکپور سے راج نارائن نرالا، ہمیر پور سے نوشاد علی، زید پور سے اکھلیش امبیڈکر، بلہا سے رمیش گوتم، ٹونڈلہ سے سنیل کمار چتوڑ۔ لکھنؤ کینٹ سے ارون دویدی، پرتاپ گڑھ (صدر) سے رنجیت سنگھ پٹیل، رامپور سے زبیر مسعود خان اور کانپور سے دیوی پرساد تیواری اور امبیڈکر نگر سے راکیش پانڈے کو امیدوار بنایا ہے۔