مذہبی جلوسوں پر پابندی عائد کر دی جائے تاکہ ملک فسادات سے محفوظ رہے: ابوعاصم اعظمی

ممبئی: ممبئی اور دلّی میں رام نومی اور ہنومان جینتی پر فرقہ وارانہ تشدد کے بعد اب مہاراشٹر سماجوادی پارٹی لیڈر و رکن اسمبلی ابوعاصم اعظمی نے وزیر اعظم نریندر مودی اور وزیر داخلہ امت شاہ سے ایک ویڈیو میسیج کے ذریعے مطالبہ کیا ہے کہ ملک میں مذہبی ریلیوں پر پابندی عائد کرکے انہیں سڑکوں پر گزرنے کی اجازت نہ دی جائے۔

انہوں نے کہا کہ سڑکوں پر نکلنے والی ان مذہبی ریلیوں سے مذہبی منافرت اور تشدد پھوٹ پڑتا ہے ایسے میں ملک کی سالمیت اور املاک کو نقصان پہنچتا ہے ایسے کئی واقعات رونما ہوئے ہیں جہاں مسجدوں کے سامنے شرپسندوں نے مذہبی نعرہ لگا کر مسلمانوں کو تشدد کے لئے آمادہ کیا ہے۔ ملک میں ایک ایسا قانون بنایا جائے جس میں تمام مذہب کی ریلیوں کو سڑکوں پر سے نکلنے پر پابندی عائد کی جائے، تبھی ہمارا ملک خوشحال رہے گا، کشمیر سے لے کر کنیا کماری تک ان ریلیوں پر پابندی عائد کرنا وقت کا تقاضہ ہے۔

ابوعاصم اعظمی نے کہا کہ حالات انتہائی ناگفتہ بہ ہے اس ملک کے تحفظ کے لئے یہ اقدامات کرنا ضروری ہے اس لئے ریلیوں کے ساتھ مذہبی اشخاص قومی لیڈران سے متعلق نازیبا کلمات کی ادائیگی کرنے والوں اور متنازع بیانات دینے والوں پر بھی سخت کارروائی کی جائے، کیونکہ گاندھی جی، امبیڈکر اور مذہبی لیڈران کی توہین پر فسادات برپا ہو چکے ہیں اس لئے اس سے متعلق سرکار کو قدم اٹھانا چاہئے۔

انہوں نے کہا کہ ملک میں عوامی اتحاد قائم رہے یہی ہمارا مقصد ہے اس میں بھائی چارگی اور فرقہ وارانہ ہم آہنگی کا قیام بھی ضروری ہے لیکن آج حالات مختلف ہیں اور نفرت انگیزی کا مظاہرہ کیا جا رہا ہے مذہب کو نفرت سے وابستہ کیا جا رہا ہے یہی وجہ ہے کہ مذہبی ریلیوں پر پابندی لگائی جائے تاکہ ملک فسادات اور دیگر تشدد سے محفو ظ رہے، انہوں نے کہا کہ شرپسند عناصر مسلسل نقص امن کے لئے خطرہ ثابت ہو رہے ہیں ان پر بھی کارروائی ضروری ہے۔