رام مندر: دسمبر میں مودی حکومت لائے گی آرڈیننس

ایودھیا: چترکوٹ پیٹھا دھیشور سوامی رام بھدرا چاریہ نے دعوی کیا کہ 11 دسمبر کے بعد مرکزی حکومت رام مندر کی تعمیر کے لئے پارلیمنٹ میں آرڈیننس لائے گی۔

سوامی نے اتوار کو پانچ کوسی پریکرما پر واقع بڑا بھکت مال باغ میں منعقد دھرم سبھا میں کہا کہ 23 نومبر کو مرکز کے ایک سینئر وزیر سے ہماری بات ہوئی تھی۔ وزیر نے ان سے کہا کہ پانچ ریاستوں میں ابھی انتخاب ہونے کی وجہ سے ضابطہ اخلاق نافذ ہے۔ 11 دسمبر کو ہم سبھی وزیر ایسا فیصلہ لینے جا رہے ہیں جس میں رام مندر تعمیرکا راستہ صاف ہو جائے گا۔

انہوں نے کہا’’ رام مندر زمین کی تعمیرکی جدوجہد بہت پرانی ہے۔ سال 1984 سے میں اس تحریک کا حصہ رہا ہوں ۔ اس تحریک کو بڑے بڑے لوگوں نے شرکت کی ۔ان میں سے کئی نے دنیا کو الوداع بھی کہ دیا۔ اس تحریک کے روح رواں اشوک سنگھل بھی اب اس دنیا میں نہیں رہے۔

انہوں نے کہا کہ ہم تو سوچ رہے تھے کہ چھ دسمبر کے پہلے پہلے رام مندر معاملے پر کوئی فیصلہ آجائے گا لیکن اب ایسا نہیں لگ رہا ہے۔ انہوں نے دھرم سبھا میں آئے رام بھکتوں سے کہا جس وزیر سے ہماری بات چیت ہوئی ہے اس وزیر کا مقام وزیر اعظم کے بعد کا ہے۔

انہوں نے یقین دہانی کرائی ہے کہ پانچ ریاستوں میں ہورہے 5اسمبلی انتخابات کے بعد ہم وزیراعظم سمیت مل کر بیٹھیں گے اور کوئی ایسا فیصلہ لینے جارہے ہیں جس میں رام مندر بن کر رہے گا۔ صرف سنت اپناآشییرواد قائم رکھیں گے۔