راجیہ سبھا: تمل ناڈو کو نیٹ امتحانت سے باہر رکھنے پر حزب اختلاف برہم، ڈی ایم کے، کانگریس سمیت کئی جماعتوں کا واک آؤٹ

نئی دہلی: دراوڑ منیتر کژگم (ڈی ایم کے) کے اراکین نے تمل ناڈو کو میڈیکل داخلے امتحان نیٹ (این ای ای ٹی) سے باہر رکھنے کے معاملے پر بحث کے لیے ان کی تحریک التواء نامنظور کیے جانے کے خلاف جمعہ کے روز راجیہ سبھا میں ہنگامہ کیا اور مطالبہ تسلیم نہ کیے جانے پر ایوان سے واک آؤٹ کر دیا۔ ان کی حمایت میں کانگریس اور ترنمول کانگریس کے اراکین بھی ایوان سے باہر چلے گئے۔

چیئرمین ایم وینکیا نائیڈو نے ایوان میں دستاویز رکھے جانے کے بعد جیسے ہی زیرو آور(وقفہ صفر) کی کاروائی شروع کرنا چاہی۔ ڈی ایم کے‘ کے رہنما تروچی شیوا نے تمل ناڈو میں نیٹ سے متعلق تحریک التواء کا مسئلہ اٹھایا۔ چیئرمین نے کہا کہ یہ مرکز اور پارلیمنٹ سے متعلق مسئلہ نہیں ہے اس لیے انہوں نے اسے قبول نہیں کیا۔ انہوں نے زیرو آور کی کارروائی شروع کرنے کے لیے ترنمول کانگریس کے رکن ندیمُل کا نام پکارا۔

اس دوران ڈی ایم کے کے اراکین نے اپنے مطالبے پر زور زور سے بولنا شروع کردیا۔ کچھ اراکین چیئرکے قریب آ کر بولنے لگے۔ نائیڈو نے کہا کہ ڈی ایم کے اراکین کی طرف سے کہی گئی کوئی بھی بات ریکارڈ میں نہیں جائے گی۔

انہوں نے اراکین سے اپنی اپنی جگہوں پر لوٹنے کی اپیل کی اور کہا کہ وہ صدر کے خطاب پر شکریہ کی تحریک میں بحث کے دوران تمل ناڈو میں نیٹ کے مسئلے پر اپنی بات رکھ سکتے ہیں۔ انہوں نے کہا کہ یہ مسئلہ نہ تو ایجنڈے میں ہے اور نہ ہی پارلیمنٹ کے سامنے ہے۔ اس دوران شوروغل کے درمیان زیرو آورکی کارروائی جاری رہی۔

ڈی ایم کے ارکان نے ان کی نافرمانی کے خلاف احتجاج کرتے ہوئے واک آؤٹ کیا اور کانگریس اور ترنمول کانگریس کے ارکان نے بھی ان کی حمایت میں ایوان سے واک آؤٹ کیا۔

نائیڈو نے بعد میں کہا کہ یہ بدقسمتی ہے۔ انہوں نے کہا کہ اس سیشن میں ابھی تک بہتر ڈھنگ سے کاروائی چل رہی تھی۔ انہوں نے کہا کہ یہ ایوان ضابطوں سے چلتاہے اور انہوں نے اس تحریک التواء کے نوٹس قبول نہیں کیا تھا۔ یہ ریاست کا موضوع ہے۔

قابل ذکر ہے کہ ڈی ایم کے‘ کے اراکین تمل ناڈو کے گورنر کی جانب سے ریاست کو نیٹ امتحان سے باہر رکھے جانے سے متعلقہ بل کو لوٹائے جانے کی مخالفت کر رہے ہیں۔ ریاستی اسمبلی نے تمل ناڈو کو نیٹ امتحان سے باہر رکھنے کا بل پاس کرکے گورنر کو بھیجا تھا لیکن انہوں نے اسے صدر کو بھیجنے کے بجائے واپس کردیا۔ ڈی ایم کے ‘ اراکین نے جمعرات کو لوک سبھا میں بھی اس معاملے پر ہنگامہ کیا تھا۔