راہل گاندھی بحرین پہنچے، شاندار استقبال

کانگریس پارٹی کے صدر کا عہدہ سنبھالنے کے بعد اپنے پہلے بیرونی دورے کے تحت کانگریس صدر راہل گاندھی سوموار کو بحرین پہنچے۔ راہل گاندھی کے وہاں پہنچنے کے ساتھ ہی ہوائی اڈے پر کافی بھیڑ جمع ہو گئی ۔ لوگ ان کے ساتھ سیلفی لینے کے لئے کافی بے چین نظر آر رہے تھے۔ کافی مشقت کے بعد سیکورٹی اہلکاروں نے راہل گاندھی کو ہوائی اڈے سے باہر نکالا۔

دریں اثنا کانگریس نے ایک ٹوئٹ کر کے کہا کہ راہل گاندھی کا بحرین میں شاندار استقبال کیا گیا ۔ وہ بحرین میں مقیم ہندوستانیوں کے ایک پروگرام میں شرکت کریں گے۔

خبروں کے مطابق راہل گاندھی کے بحرین پہنچنے سے پہلے ہی کافی لوگ ان کے استقبال کے لئے جمع تھے۔ کچھ لوگوں نے زور شور سے نعرے لگا کران کا استقبال کیا۔ اس کے بعد راہل گاندھی ایئر پورٹ لابی میں پہنچے تو ان سے ملنے اور ان کے ساتھ سیلفی لینے کے لئے لوگوں میں ہوڑ مچ گئی۔ دریں اثنا راہل گاندھی کے ساتھ موجود سیکورٹی اہلکاروں کو انہیں وہاں سے نکالنے میں کافی مشقت کرنی پڑی۔

ہوائی اڈے پر راہل گاندھی کے استقبال کے لئے ’گلوبل آرگینائزیشن آف پیپلز آ ف انڈین اوریجن‘ یعنی جی او پی آئی او کے ارکان بھی موجود تھے۔

بحرین روانہ ہونے سےپہلے راہل گاندھی نے ٹوئٹ میں لکھا ’’ این آر آئی ہماری طاقت کے نمائند گان ہیں اور دنیا میں ہمارے سفیر ہو تے ہیں۔ میں اپنے ملک کے لوگوں سے ملنے کا انتظار کر رہا ہوں۔‘‘

اطلاعات کے مطابق راہل گاندھی اس دورے میں بحرین کے شہزادے خلیفہ بن سلمان الخلیفہ سے بھی مل سکتے ہیں۔ خلیجی ممالک میں تقریباً 35 لاکھ ہندوستانی مقیم ہیں۔ کانگریس ان لوگوں تک پہنچ بنانے کی کوشش کر رہی ہے۔ خبروں کے مطابق راہل گاندھی کے اعزاز میں بحرین کے شہزادہ نے ظہرانہ کا اہتمام کیا ہے۔ علاوہ ازیں راہل گاندھی بحرین میں ہندوستانی نژاد کے کاروباریوں اور تاجروں سے ملاقات کریں گے۔