راجیو گاندھی کی برسی پر راہل گاندھی اور کھڑگے نے ویر بھومی پر پیش کیا خراج عقیدت، ان کی خدمات کو یاد کیا

ہندوستان کے سابق وزیر اعظم اور بھارت رتن راجیو گاندھی کی برسی کے موقع پر کانگریس نے انہیں خراج تحسین پیش کیا۔ کانگریس صدر ملکارجن کھڑگے اور لوک سبھا میں قائد حزب اختلاف راہل گاندھی دونوں نے ویر بھومی، جو راجیو گاندھی کی سمادھی ہے، جا کر گلہائے عقیدت پیش کیے اور ان کی ملک کی ترقی میں نمایاں خدمات کو یاد کیا۔

ملکارجن کھڑگے نے کہا کہ راجیو گاندھی نے اپنی زندگی ملک کے لیے وقف کر دی اور ان کی دوراندیشی نے ہندوستان کو 21ویں صدی کے چیلنجز اور مواقع کے لیے تیار کیا۔ راہل گاندھی نے اپنی پوسٹ میں لکھا، ’’پاپا، آپ کی یادیں ہر قدم پر میری رہنمائی کرتی ہیں۔ آپ کے ادھورے خوابوں کو شرمندہ تعبیر کرنا ہی میرا عہد ہے - اور میں انہیں پورا کر کے رہوں گا۔’’

انہوں نے بتایا کہ راجیو گاندھی نے نوجوانوں کو سیاسی عمل میں شامل کرنے کے لیے ووٹنگ کی عمر 18 سال کی حد مقرر کی، پنچایتی راج کو مضبوط کیا، ٹیلی کمیونیکیشن اور آئی ٹی انقلاب کی بنیاد رکھی، کمپیوٹرائزیشن اور تعلیم میں شمولیتی پالیسیاں متعارف کروائیں۔ ان کی قیادت میں ملک میں یونیورسل ایمیونائزیشن پروگرام بھی شروع کیا گیا، جس سے صحت عامہ میں بہتری آئی۔

اس موقع پر کانگریس پارٹی نے راجیو گاندھی کے مشہور قول کو بھی شیئر کیا، ’’ہندوستان ایک قدیم ملک ہے لیکن نوجوان قوم ہے۔ میرا خواب ہے کہ ہندوستان ایک مضبوط، آزاد، خود انحصار ملک بنے اور دنیا میں سب سے آگے آئے۔‘‘ راجیو گاندھی کے ایک اور قول کو شیئر کیا گیا، انہوں نے کہا تھا، ’’تعلیم ایک ایسا آلہ ہے جو گزشتہ ہزاروں برسوں کے سماجی نظام کو برابر کی سطح پر لا سکتا ہے۔‘‘

کانگریس نے کہا کہ راجیو گاندھی کی قربانی اور خدمات آج بھی ہر ہندوستانی کے لیے تحریک کا سبب ہیں اور ان کے نظریات ملک کی ترقی کے لیے مشعل راہ ہیں۔